मनोरंजन विश्वातून अतिशय दु:खद बातमी समोर येत आहे. एका 35 वर्षीय प्रसिद्ध अभिनेत्रीचा एड्सने मृत्यू झाला आहे. तिने गेल्या काही वर्षांपासून कुटुंबाशी असलेले सर्व संबंध तोडले होते. त्यामुळे अभिनेत्रीच्या शेवटच्या आणि कठीण काळात तिच्या सोबत कोणीही नव्हते. आता या अभिनेत्रीच्या निधनानंतर सिनेसृष्टीतील अनेकजण श्रद्धांजली वाहताना दिसत आहेत.
‘द रिंग’ आणि ‘लिलो अँड स्टिच’ या चित्रपटांमुळे जागभरात प्रसिद्धी मिळवणाऱ्या डेवे चेसचे निधन झाले आहे. कधीकाळी हॉलिवूडच्या चमकदार जगात चर्चेत असणारी ही अभिनेत्री गेल्या अनेक वर्षांपासून लोकांच्या नजरेपासून दूर होती. कुटुंबाशी संबंध तोडले, अभिनय सोडला आणि शेवटी बेघर अवस्थेत जीवन जगत होती.
मृत्यू कशामुळे झाला?
डेवे चेस यांचा मृत्यू जूनमध्ये झाला. त्यावेळी मृत्यूचे नेमके कारण स्पष्ट झाले नव्हते. आता लॉस एंजिल्स कोरोनर कार्यालयाने अधिकृतपणे जाहीर केले आहे की, त्यांच्या मृत्यूचे मुख्य कारण एड्स (AIDS) होते. याशिवाय त्या बॅक्टेरियल मेनिन्जाइटिस, सेप्टिक शॉक आणि शरीरातील गंभीर संक्रमणानेही ग्रस्त होत्या. बऱ्याच काळापासून विविध प्रकारच्या अंमली पदार्थांचे सेवन हे देखील त्यांच्या बिघडत चाललेल्या आरोग्याचे एक प्रमुख कारण मानले जात आहे.
यशस्वी कारकीर्द ते रस्त्यावर येणे
डेवे चेसने अतिशय लहान वयातच अभिनय क्षेत्रात आपली छाप सोडली होती. ‘द रिंग’ चित्रपटातील भयावह ‘समारा मॉर्गन’ ही भूमिका आणि ‘लिलो अँड स्टिच’ या प्रसिद्ध फ्रेंचायझीमध्ये वॉइस आर्टिस्ट म्हणून तिचे काम आजही प्रेक्षकांच्या मनात आहे. ‘डॉनी डार्को’, ‘एस. डार्को’ सारख्या चित्रपटांमध्येही तिने भूमिका साकारली होती. मात्र, २०१६ नंतर ती अचानक सर्वांपासून पूर्णपणे लांब झाली. तिने सोशलल मीडियापासून ब्रेक घेतला. तिच्या माजी मॅनेजरच्या मते, एका चित्रपटाच्या मीटिंगला न आल्यानंतर त्यांनी ना मॅनेजरशी संपर्क साधला, ना कुटुंबाशी. पुढील वर्षांमध्ये त्यांचे नाव चोरीच्या गाडीत सापडणे, ड्रग्ज बाळगणे आणि इतर कायदेशीर प्रकरणांमध्येही आले. कुटुंबीयांनी सांगितले की, ती दीर्घकाळ बेघर अवस्थेत राहिली आणि अंमली पदार्थांच्या व्यसनाशी झुंज देत होती. डेवे चेसच्या अचानक निधनाने चाहत्यांना मोठा धक्का बसला आहे. एकेकाळी बाल कलाकार म्हणून चमकणारी ती अभिनेत्री आयुष्याच्या शेवटच्या टप्प्यात किती कठीण संघर्ष करत होती, हे पाहून अनेकजण हळहळ व्यक्त करत आहेत.
Leave a Reply