अभिनेता सनी देओल सध्या आगामी ‘बंटवारा 1947’ या चित्रपटाच्या प्रमोशनमध्ये व्यस्त आहे. रविवारी या चित्रपटाच्या प्रमोशननिमित्त एका कार्यक्रमाचं आयोजन करण्यात आलं होतं. या कार्यक्रमात जेव्हा सनीला पाकिस्तानबद्दल प्रश्न विचारण्यात आला, तेव्हा त्याने दिवंगत अभिनेते आणि वडील धर्मेंद्र यांच्या वक्तव्याचा उल्लेख केला. “जर भारत माझी आई असेल तर पाकिस्तान माझी मावशी आहे”, असं सनी देओल म्हणाला. त्याचा हा व्हिडीओ सोशल मीडियावर व्हायरल होत असून त्यावर नेटकरी विविध प्रतिक्रिया देत आहेत. त्याचसोबत या कार्यक्रमात सनी देओलने राजकारणाशी संबंधित कोणत्याही प्रश्नाचं उत्तर देणं टाळलं.
सनीने सर्वप्रथम हे स्पष्ट केलं की ‘बंटवारा 1947’ या चित्रपटाचं शूटिंग पाकिस्तानमध्ये नाही तर भारतातच झालं आहे. तो म्हणाला, “या चित्रपटाचं शूटिंग तिथे नाही, तर हिंदुस्तानातच झालं आहे. हा संपूर्ण देश एकच होता. जसं पापा (धर्मेंद्र) म्हणायचे की, ही माझी आई आहे, तर ती माझी मावशी आहे. ही गोष्ट तर तुम्हाला खूप चांगल्याप्रकारे माहीत आहे. आपण सर्वजण कोणत्या ना कोणत्या बाबतीत एकमेकांशी जोडलेलो आहोत. मला प्रत्येकाच्या तपशिलात जायचं नाही, पण आम्ही कलाकार आहोत, आम्ही निर्माते आहोत. आम्ही कथा निवडतो आणि त्या बनवतो. आम्ही त्यांना राजकीय रंग देत नाही आणि आम्हाला तसं करायचंही नाही. त्यामुळे मी प्रत्येकाबद्दल बोलणार नाही.”
पहा व्हिडीओ-
If Bharat is my Mother
Pakistan is my Aunt
– Sunny Deol pic.twitter.com/5t5pvKkDSa
— The Jaipur Dialogues (@JaipurDialogues) August 3, 2026
पाकिस्तानला मावशी म्हटल्याने सनी देओलवर नेटकऱ्यांकडून जोरदार टीका होत आहे. ‘तो खरंच बोलतोय, संपूर्ण कुटुंबाला उद्ध्वस्त करणारी मावशी आहे ती’, असं एकाने म्हटलंय. तर ‘चित्रपटाचं प्रदर्शन जवळ येताच यांचं शेजारच्या देशांवरील प्रेम जागृत होतं’, असा टोला दुसऱ्याने लगावला आहे. ‘चित्रपटाची विक्री करण्यासाठी ही नवी मार्केटिंग स्ट्रॅटेजी आहे’, असं नेटकऱ्यांनी म्हटलंय.
‘बंटवारा 1947’ या चित्रपटाच्या निमित्ताने बऱ्याच काळानंतर सनी देओल आणि प्रिती झिंटा एकत्र काम करत आहेत. याशिवाय यामध्ये शबाना आझमी, अली फजल आणि अभिमन्यू सिंह यांच्याही भूमिका आहेत. राजकुमार संतोषी दिग्दर्शित हा चित्रपट 16 ऑगस्ट 2026 रोजी थिएटरमध्ये प्रदर्शित होणार आहे.
Leave a Reply