आदित्य धर दिग्दर्शित ‘धुरंधर : द रिव्हेंज’ या चित्रपटाने बॉक्स ऑफिसवर आता ओटीटी प्लॅटफॉर्मवरही धुमाकूळ घातला आहे. थिएटरमध्ये पाहिल्यानंतरही अनेकांनी हा चित्रपट पुन्हा ओटीटीवर पाहण्यासाठी धाव घेतली आहे आणि यामुळे पहिल्याच वीकेंडला मोठा रेकॉर्ड बनला आहे. ‘जियो हॉटस्टार’ या ओटीटी प्लॅटफॉर्मने दिलेल्या माहितीनुसार, रणवीर सिंहच्या या चित्रपटाने ओपनिंग वीकेंडमध्येच 5 कोटी प्रेक्षक खेचून आणले आहेत. त्यामुळे या स्ट्रीमिंग साइटवर हा आतापर्यंतचा सर्वांत मोठा डिजिटल लाँच बनला आहे. विशेष म्हणजे हा चित्रपट 83 दिवसांपर्यंत म्हणजेच जवळपास 12 आठवड्यांपर्यंत थिएटरमध्ये चालला. त्यानंतर ओटीटी आल्यावरही मोठ्या संख्येने प्रेक्षक तो पाहू लागले.
हिंदी, तमिळ, तेलुगू, मल्याळम आणि कन्नड भाषांमध्ये हा चित्रपट ओटीटी प्लॅटफॉर्मवर उपलब्ध आहे. आश्चर्याची बाब म्हणजे ‘धुरंधर 2’ थिएटरमध्ये प्रदर्शित झाल्यानंतर ओपनिंग वीकेंडमध्ये प्रेक्षकांनी जेवढी गर्दी केली होती, त्यापेक्षा पाच पटींनी जास्त ओटीटीवर प्रेक्षकवर्ग पोहोचला आहे. या रिपोर्टनुसार, ‘धुरंधर 2’ पाहण्याच्या एकूण वेळेपैकी जवळपास 60 टक्के वेळ कनेक्टेड टीव्ही उपकरणांवरून पाहिला गेला आहे. एकंदरीत या चित्रपटाला थिएटरमध्ये आणि ओटीटी प्लॅटफॉर्मवरही अभूतपूर्व प्रतिसाद मिळाला आहे.
View this post on Instagram
‘जियो हॉटस्टार’ने सांगितलं की प्रेक्षकांचा सहभाग आणखी वाढवण्यासाठी त्यांनी चित्रपटाची ‘रॉ’ (कच्ची) किंवा न पाहिलेली आवृत्ती आणि 30 मिनिटांचा प्री-शो सेगमेंटदेखील सादर केला. या सेगमेंटमध्ये पडद्यामागील दृश्ये आणि कलाकारांसोबतचा संवाद यांचा समावेश होता. ‘धुरंधर : द रिव्हेंज’ने पहिल्या तीन दिवसांतच ‘धुरंधर’ या पहिल्या भागाच्या ओटीटी ओपनिंगचाही विक्रम मोडला आहे. थिएटरमध्ये प्रदर्शित झालेल्या चित्रपटाच्या पहिल्या आठवड्याच्या तुलनेच ओटीटीवर प्रेक्षकांची संख्या जवळपास पाच पटीने जास्त आहे.
जगभरातील थिएटर्समध्ये धुमाकूळ घातल्यानंतर आदित्य धर दिग्दर्शित ‘धुरंधर : द रिव्हेंज’ हा दुसरा भाग 4 जून 2026 रोजी जियो हॉटस्टार या ओटीटी प्लॅटफॉर्मवर प्रदर्शित झाला. 2025 च्या अखेरीस प्रदर्शित झालेल्या ‘धुरंधर’ या चित्रपटानंतर दुसऱ्या भागाची प्रचंड उत्सुकता होती. त्यानंतर हा दुसरा भाग ओटीटीवर कधी येणार, याचीही प्रतीक्षा जगभरातील प्रेक्षक करत होते. जियो हॉटस्टारने 50 हून अधिक ब्रँड पार्टनर्स आणि 30 मिनिटांच्या प्री-शो इव्हेंटसह या चित्रपटाच्या प्रदर्शनाला ‘रॉ अँड अनदेखा’ या विशेष डिजिटल प्रीमिअरच्या रुपात प्रसिद्धी दिली.
Leave a Reply