दह्याचे फायदे तुम्ही अनेकदा ऐकले किंवा वाचले देखील असतील. कारण दही हा प्रत्येक भारतीय आहाराचा एक अविभाज्य भाग आहे. लहानांपासून ते अगदी मोठ्यांपर्यंत प्रत्येकजण आवडीने दहीचे सेवन करतो. कारण चविष्ट, हलके आणि सहज पचणारे दही आरोग्यासाठी फायदेशीर ठरते. उन्हाळ्यात दह्याची लोकप्रियता वाढते, कारण ते शरीराला थंडावा देण्यास आणि अन्नाची चव वाढविण्यात मदत करते. म्हणूनच दही संतुलित आहाराचा एक आवश्यक भाग मानले जाते. दह्यामध्ये प्रथिने, कॅल्शियम, फॉस्फरस, व्हिटॅमिन बी12, रायबोफ्लेविन, पोटॅशियम आणि प्रोबायोटिक्स यांसारखी अनेक आवश्यक पोषक तत्वे असतात. त्याचे माफक प्रमाणात सेवन केल्याने पचनसंस्था निरोगी राहण्यास, हाडे मजबूत होण्यास, आवश्यक पोषक तत्वे मिळण्यास आणि आतड्यांच्या आरोग्यास मदत होते. शिवाय दह्यामुळे पोट जास्त वेळ भरलेले राहते असेही मानले जाते. चला तर मग याच दह्यापासून बनवल्या जाणाऱ्या काही झटपट आणि चविष्ट रेसिपी तसेच हे पदार्थ अधिक पौष्टिक कसे बनवायचे आणि त्याचे सेवन करताना कोणत्या गोष्टी विचारात घ्याव्यात, हे जाणून घेऊयात.
दह्यासोबत बनवा या 5 झटपट आणि चविष्ट पदार्थ
दही भात
शिजवलेला भात थंड करून त्यात ताजे दही मिक्स करा. चवीसाठी मोहरी, कढीपत्ता, हिरव्या मिरच्यांची थोडी फोडणी द्या. तुम्हाला आवडत असल्यास त्यात डाळिंब किंवा किसलेले गाजर देखील मिक्स करू शकता. हा एक हलका आणि सहज पचणारा पदार्थ असून तो प्रोबायोटिक्स आणि कर्बोदकांचा चांगला स्रोत मानला जातो.
दही सँडविच
ताजे दही थोडे घट्ट करून त्यात काकडी, गाजर, शिमला मिरची, काळी मिरी आणि मीठ टाका. हे मिश्रण ब्राऊन ब्रेडवर पसरवून सँडविच बनवा. हा एक झटपट पौष्टिक नाश्ता आहे, ज्यातून प्रथिने, कॅल्शियम, जीवनसत्त्वे आणि भाज्यांमधून मिळणारे फायबर मिळतात.
व्हेजिटेबल रायता
दह्यामध्ये बारीक चिरलेली काकडी, गाजर, टोमॅटो, कांदा आणि भाजलेल्या जिऱ्याची पूड मिक्स करा. वरून कोथिंबीर टाकून सर्व्ह करा. ही एक चविष्ट आणि पौष्टिक रेसिपी आहे. जी शरीरातील पाण्याची पातळी टिकवून ठेवण्यास, पचनक्रिया सुधारण्यास आणि अनेक आवश्यक पोषक तत्वे प्रदान करण्यास मदत करते.
दही ओट्स
ओट्स शिजवून घ्या, त्यानंतर ते थंड करा आणि दह्यामध्ये मिक्स करा. त्यावर सफरचंद, केळी, बेरी, चिया सीड्स किंवा सुका मेवा टाका. हा फायबर, प्रथिने आणि प्रोबायोटिक्सने समृद्ध असलेला एक आरोग्यदायी नाश्ता आहे, जो तुम्हाला जास्त वेळ पोट भरल्यासारखे वाटण्यास मदत करू शकतो.
दही स्मूदी
दह्यामध्ये केळी, आंबा, स्ट्रॉबेरी किंवा तुमच्या आवडीचे कोणतेही फळ मिक्स करा. चवीसाठी तुम्ही त्यात थोडे मध आणि चिया सीड्ससुद्धा टाकू शकता. हे एक स्वादिष्ट आणि पौष्टिक पेय आहे, जे शरीराला प्रथिने, कॅल्शियम, जीवनसत्त्वे आणि ऊर्जा पुरवण्यास मदत करते.
दही अधिक पौष्टिक बनवण्यासाठी त्यात कोणत्या गोष्टी मिसळता येतात?
दह्यामध्ये काकडी, गाजर, टोमॅटो आणि बीट यांसारखी हंगामी फळे आणि भाज्या घातल्याने त्याचे पौष्टिक मूल्य वाढते. चिया सीड्स, जवस, तीळ किंवा ड्रायफ्रुट्स मिक्स केल्याने आरोग्यदायी फॅट आणि फायबरचे प्रमाण वाढू शकते.
दही ओट्स, मुसली किंवा मोड आलेल्या धान्यांसोबत खाल्ल्याने ते एक संतुलित आणि पौष्टिक जेवण बनते. चव आणि पोषणमूल्ये दोन्ही वाढवण्यासाठी त्यात पुदिना, कोथिंबीर आणि भाजलेले जिरे देखील मिक्स करता येते. दह्यामध्ये जास्त साखर घालणे टाळावे याची खात्री करा.
दही खाताना कोणत्या गोष्टी लक्षात ठेवाव्यात?
नेहमी ताजे व उत्तम प्रतीचे दही खा. पॅकबंद दही वापरत असल्यास त्याची मुदतची तारीख नक्की तपासा. दह्यामध्ये अतिरिक्त साखर किंवा गोड पाक टाकणे टाळा. त्याचे सेवन प्रमाणात करा आणि त्याला संतुलित आहाराचा भाग बनवा.
जर तुम्हाला दुधाची किंवा दुग्धजन्य पदार्थांची ॲलर्जी असेल किंवा लॅक्टोज असहिष्णुता असेल, तर दही खाण्यापूर्वी डॉक्टर किंवा आहारतज्ञांचा सल्ला घेणे चांगले.
( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)
Leave a Reply