दहिसरच्या विद्या मंदिरच्या यशात मानाचा तुरा गेली अनेक वर्षे शालांत परीक्षेत 100 टक्के निकाल देणारी शाळा म्हणून विद्या प्रसारक मंडळाच्या विद्या मंदिर शाळेचे नाव पश्चिम उपनगरात अग्रक्रमाने घेतले जाते. विद्यार्थ्यांच्या सर्वांगीण विकासासाठी शिक्षक आणि शाळा प्रशासन नेहमीच प्रयत्नशील राहिले आहे. त्यामुळे शाळेचा निकाल नेहमी उंचावत राहिला आणि दहिसरवासियांचा आपल्या शाळेचा अभिमान वाढत गेला. शालांत प्रमाणपत्र परीक्षेत 100 टक्के निकालाची परंपरा कायम राखणाऱ्या विद्या मंदिर शाळेत यंदा मानाच्या शिरपेचात आणखी एक तुरा रोवला आहे. शिष्यवृत्ती परीक्षा 2025-2026 मध्ये विद्या मंदिर शाळेतील वेदांश सचिन खानोलकर याने इयत्ता 5 वीच्या शिष्यवृत्ती परीक्षेत 300 पैकी 264 गुण मिळवत मुंबई जिल्ह्यातून प्रथम क्रमांक पटकावला आहे. ट्विशा निलेश पाटील हिने 244 गुण मिळवून इयत्ता 8 वी शिष्यवृत्ती परीक्षेत शाळेतून पहिला येण्याचा मान मिळवला आहे.
दांश खानोलकर यांच्या या देदीप्यमान यशाचे सर्वत्र कौतुक होत आहे. प्राथमिक शाळेपासून विद्या मंदिर शाळेत शिक्षण घेणाऱ्या या विद्यार्थ्याने अगदी लहान वयातच शाळेच्या नावाचा लौकिक वाढवण्यात हातभार योगदान दिले आहे. वेदांश आणि ट्विशा याच्या यशाचे अभिनंदन करताना संस्थेचे कार्यवाह राहुल केळकर यांनी विद्यार्थ्यांना मार्गदर्शन करणाऱ्या सर्व शिक्षक वर्गाचे कौतुक केले.
शाळेतील शिक्षकांनी वर्षभर विद्यार्थ्यांच्या ज्ञानार्जनात भर पडावी यासाठी मेहनत घेतली, नियमित सराव परीक्षा आणि तज्ज्ञ लोकांनी केलेलं मार्गदर्शन आणि अर्थातच विद्यार्थ्याची मेहनत याचे हे फलित असल्याचेही त्यांनी नमूद केले. इयत्ता 5 वी आणि 8 वी च्या शिष्यवृत्ती परीक्षेमध्ये एकूण 21 आणि 16 विद्यार्थ्यांना शिष्यवृत्ती प्राप्त केली आहे. सर्व यशस्वी विद्यार्थ्यांचे सर्वत्र कौतुक होत असून विद्यार्थ्यांनी अशीच नवनवी शिखरे गाठावीत यासाठी शिक्षक मेहनत घेत असून विद्यार्थ्यांच्या सर्वांगीण विकासासाठी संचालक मंडळ पूर्ण ताकदीनिशी विद्यार्थ्यांच्या पाठीशी असल्याची ग्वाही कार्यवाह यांनी दिली.
Leave a Reply