‘मोगरा फुलला’ हा कार्यक्रम आटपून घरी परतत असताना प्रसिद्ध गायक गणेश शिंदे यांच्या गाडीचा भीषण अपघात झाला. क्षणार्धात एअरबॅग्स उघडल्याने मोठा अनर्थ टळला आणि गाडीत असलेल्या तिघांचे प्राण वाचले. त्यापैकी एअरबॅगमुळे गणेश शिंदे यांच्या छातीला दुखापत झाली असून गायिका सन्मिता शिंदे आणि गायिका प्रतिक्षा या दोघींच्या पायाला दुखापत झाली. या अपघाताबद्दलची माहिती खुद्द गणेश यांनी सोशल मीडियाद्वारे दिली आहे. त्यांच्या या पोस्टवर नेटकऱ्यांनी कमेंट्स करत काळजी घेण्याचं आवाहन केलं आहे.
नेमकं काय घडलं?
घडलेल्या घटनेबद्दल गणेश शिंदे यांनी इन्स्टाग्रामवरील पोस्टमध्ये लिहिलं, ‘कानावरून गेलं.. ‘मोगरा फुलला’ हा कार्यक्रम आटपून घरी परतत असताना आमच्या गाडीला भीषण अपघात झाला. क्षणार्धात एअरबॅग्स ओपन झाल्याने मोठा अनर्थ टळला. मला एअरबॅग्समुळे छातीला दुखापत झाली असली तरी ती ऑपरेशनशिवाय बरी होण्यासारखी आहे. सन्मिता आणि गायिका प्रतिक्षा यांच्या पायाला दुखापत झाली. मित्रपरिवार, ॲम्ब्युलन्स सेवा आणि माऊली हॉस्पिटल तसंच संचेती हॉस्पिटल इथल्या डॉक्टरांनी तातडीने मदत केल्यामुळे सर्व उपचार वेळेत सुरू झाले. प्रतिक्षाचं ऑपरेशन व्यवस्थित पार पडलं असून सन्मिताचंही ऑपरेशन आता व्यवस्थित पार पडेल. ऑपरेशन थिएटरमध्ये जाताना तिला ज्ञानोबरायांचा फोटो दाखवला मोबाईलमध्ये म्हटलं, तू आता बरी होशील आणि माऊलीसमोर अभंग म्हणशील.. इवलेसे रोप लावियेले द्वारी..’
View this post on Instagram
‘या संपूर्ण प्रसंगात अनेक प्रश्न मनात येतात, पण शेवटी जाणवतं की अनेक गोष्टी आपल्या हातात नसतात. पुढे अधिक काळजी घ्यायची आणि बाकी सर्व माऊलींच्या चरणी स्वाधीन करायचं. आपल्या सर्व रसिक श्रोत्यांचे, मित्रपरिवाराचे, शुभेच्छा आणि आशीर्वाद आहेतच. अनेक मित्रांनी मान्यवरांनी मनापासून सहकार्य केलं आणि तातडीने मदत उपलब्ध झाली आभारी आहोत. ज्ञानोबारायांची कृपा आणि आपला आशीर्वाद कायम सोबत राहो,’ अशा शब्दांत त्यांनी भावना व्यक्त केल्या आहेत.
या पोस्टच्या शेवटी त्यांनी तुकोबारायांचे काही शब्द लिहिले आहेत. “कृपाळू सज्जन, तुम्ही संतजन, परी पायावेगळा करू नका..”, असं त्यांनी लिहिलं आहे. गणेश शिंदे यांच्या या पोस्टवर नेटकऱ्यांनी विविध प्रतिक्रिया दिल्या आहेत.
Leave a Reply