Donald Trump : अमेरिका आणि इराण यांच्यातील युद्ध अद्याप संपलेलं नाही. दोन्ही देशांत मध्यस्थांच्या मार्फत युद्धसमाप्तीवर चर्चा सुरू आहे. परंतु अद्याप यात कोणालाही यश आलेलं नाही. होर्मुझची सामुद्रधुनी, इराणकडे असलेला सक्रीय युरेनियमचा साठा या कळीच्या मुद्द्यांमुळे इराण-अमेरिकेत युद्धसमाप्तीचा करार सत्यात उतरत नाहीये. काही दिवसांपूर्वी आमचा इराणसोबत हा करार लवकरच अस्तित्त्वात येणार आहे, असा दावा अमेरिकन राष्ट्राध्यक्ष डोनाल्ड ट्रम्प यांनी केला होता. परंतु आता इस्रायलकडून लेबनॉनवर केल्या जाणाऱ्या हल्ल्यांमुळे इराणने कठोर पवित्रा धारण केला असून युद्धसमाप्तीची चर्चाच थांबवली आहे, असा दावा केला जात आहे. असे असतानाच आता डोनाल्ड ट्रम्प यांनी इस्रायलचे पंतप्रधान बेजामीन नेतान्याहू यांना कठोर शब्दांत सुनावलं आहे, असं सांगितलं जात आहे.
नेमकं काय घडलं?
मिळालेल्या माहितीनुसार डोनाल्ड ट्रम्प यांनी बेंजामीन नेतान्याहू यांना अतिशय कठोर शब्दांत सुनावलं आहे. अमेरिका आणि इस्त्रायल यांच्यात जवळचे संबंध आहेत. इराणविरोधात हल्ला करताना हे दोन्ही देश एकत्र आले होते. परंतु आता हेच युद्ध धांबवण्यासाठी प्रयत्न सुरू असताना इस्रायलकडून मात्र लेबनॉनवर हल्ले केले जात असल्याने ट्रम्प चांगलेच भडकले आहेत. ट्रम्प यांना नेतान्याहू यांना खडसावल्याचे एक्सियोस या अमेरिकन वृत्तसंकेतस्थळाने दिले आहे.
डोनाल्ड ट्रम्प नेमकं काय म्हणाले?
डोनाल्ड ट्रम्प यांनी नेतान्याहू यांना फोन कॉल करून सुनावल्याचं बोललं जात आहे. या फोन कॉलमध्ये ट्रम्प चांगलेच भडकले होते. “तुमचं डोकं खराब आहे का. मी नसतो तर तुम्ही आतापर्यंत तुरुंगात असता. मीच तुमचा जीव वाचवतो आहे. तुमच्यामुळे प्रत्येकजण माझा तिरस्कार करत आहे. तुमच्या अशा कामांमुळे प्रत्येकजण इस्रायलचा तिरस्कार करतो,” अशा शब्दांत ट्रम्प यांनी नेतान्याहू यांना खडसावल्याचे बोलले जात आहे.
एवढा वाद का निर्माण झाला?
दरम्यान, ट्रम्प हे नेतान्याहू यांचे मित्र असले तरीही त्यांच्यात एवढी धुसफूस का चालली आहे, असे विचारले जात आहे. ट्रम्प इस्रायलवर नाराज आहेत का? असा सवाल उपस्थित केला जातोय. दरम्यान, ट्रम्प यांची ही नाराजी नसून दोन्ही देशांमधील धोरणात्मक मतभेदांमुळे अशी स्थिती निर्माण झाल्याचे सांगितले जात आहे. इराणसोबतचे युद्ध संपवून आपले हे जागतिक यश आहे, असे ट्रम्प यांना अमेरिका तसेच जगापुढे मांडायचे आहे. अमेरिकेचे माजी राष्ट्राध्यक्ष बराक ओबामा यांच्यापेक्षा मी सरस आहे, हेदेखील ट्रम्प यांना सिद्ध करून दाखवायचे आहे. त्यामुळेच त्यांचा हा खटाटोप चालू असल्याचे बोलले जात आहे.
Leave a Reply