इराण आणि अमेरिका यांच्यातील तणाव सतत वाढत चालला आहे. अमेरिकेने इराणवर हल्ले सुरू केले आहेत, याला इराणकडून प्रत्युत्तर देण्यात येत आहे. इराणने अमेरिकेची अनेक लढाऊ विमाने उद्ध्वस्त केल्याचा दावा केला आहे. इराणच्या म्हणण्यानुसार, जॉर्डनमध्ये तैनात असलेल्या अनेक अमेरिकी लष्करी फायटर जेट्सना बॅलिस्टिक क्षेपणास्त्रे आणि ड्रोनच्या सहाय्याने हल्ला करण्यात आला. तर दुसरीकडे जॉर्डनच्या लष्कराने तीन इराणी क्षेपणास्त्रे हवेतच पाडल्याचा दावा केला आहे.
इराणच्या हल्ल्यात अनेक लष्करी विमाने नष्ट
अनेरिकन फायटर जेटवर हल्ला करण्याचा दावा करताना इराणच्या इस्लामिक रिव्होल्यूशनरी गार्ड कॉर्प्सने सांगितले की, या हल्ल्यात अमेरिकेची अनेक इंधन भरणारी विमाने आणि फायटर जेट्स नष्ट करण्यात आली असून आणखी काहींना मोठे नुकसान झाले आहे. तसेच इराणी सैनिकांच्या हत्येचा बदला म्हणून सीरियातील अल-तनफ येथील अमेरिकेच्या स्पेशल ऑपरेशन कमांड सेंटरवरही हल्ला करण्यात आल्याचा दावा IRGC ने केला आहे. मात्र, या दाव्यांना अद्याप कोणतीही अधिकृत पुष्टी मिळालेली नाही.
अमेरिकेचे मोठे नुकसान
IRGC च्या एरोस्पेस फोर्सने जारी केलेल्या निवेदनानुसार, जॉर्डनमधील अमेरिकी लढाऊ विमानांवरील हा हल्ला ‘ऑपरेशन नस्र-2’च्या 14 व्या टप्प्याअंतर्गत दोन फेऱ्यांमध्ये करण्यात आला. या कारवाईत अनेक बॅलिस्टिक क्षेपणास्त्रे आणि मोठ्या संख्येने ड्रोनचा वापर करण्यात आल्याचा दावा करण्यात आला आहे. या हल्ल्यामुळे अमेरिकेची अनेक टँकर विमाने आणि फायटर जेट्स नष्ट झाले असून काहींना गंभीर नुकसान झाल्याचे IRGC ने म्हटले आहे.
अमेरिकेने इराणमधील पुल उडवले
अमेरिकेने शुक्रवारी सकाळी इराणवरील हल्ल्यांची तीव्रता वाढवत अनेक पूल, ऊर्जा प्रकल्प आणि महत्त्वाच्या पायाभूत सुविधांवर हल्ले केले. या हल्ल्यांमध्ये इराणमधील एका महत्त्वाच्या बंदरावरील मनोरा उद्ध्वस्त झाल्याचेही समोर आले आहे. इराणच्या होर्मोजगान प्रांतातील बंदर खमीर परिसरातील दोन पुलांवर झालेल्या अमेरिकी हवाई हल्ल्यांमध्ये सात नागरिकांचा मृत्यू झाला असून नऊ जण जखमी झाल्याचा दावा इराणी माध्यमांनी केला आहे. आता आगामी काळात दोन्ही देशांमधील वाद आणखी वाढण्याची शक्यता आहे.
Leave a Reply