ठरलं तर मग! युवराज सिंग दिसणार कोचच्या भूमिकेत; लवकरच संघाची धुरा हाती घेणार

आयपीएल संपून आता काही दिवस उलटले आहेत. फायनल सामना जिंकून रॉयल चॅलेंजर्स बेंगळुरुने आयपीएल 2026चे विजेतेपद पुन्हा एकदा जिंकले. 2025 आणि 2026 सलग दोन्ही वर्षी आरसीबीने आयपीएल ट्रॉफी जिंकली. यंदा काही संघानी उत्कृष्ट कामगिरी केली पण काही संघानी अतिशय वाईट कामगिरी केली. काही संघाना पुढील हंगामासाठी खूप बदल करण्याची गरज आहे. पुढील हंगामापूर्वी काही संघ मोठे निर्णय घेण्याच्या तयारीत आहे. यातच आता दिल्ली कॅपिटल्सने एक मोठा निर्णय घेतला असल्याचा समोर येत आहे. दिल्ली कॅपिटल्स आपल्या कॉचिंग स्टाफमध्ये मोठा बदल घडवण्याच्या तयारीत असल्याचे दिसत आहे.

भारताचा माजी दिग्गज खेळाडू युवराज सिंगने आयपीएलमध्ये पुनरागमन करण्याचा निर्णय घेतला आहे. यावेळी तो खेळाडू म्हणून नव्हे, तर प्रशिक्षक म्हणून परतणार आहे. टाइम्स ऑफ इंडियाच्या वृत्तानुसार, युवराज सिंग दिल्ली कॅपिटल्सचा प्रशिक्षक म्हणून आयपीएलमध्ये परतणार आहे. तो 2027 च्या आयपीएल हंगामापासून दिल्ली कॅपिटल्सच्या सपोर्ट स्टाफमध्ये सामील होईल. युवराज पहिल्यांदाच प्रशिक्षणात सहभागी होणार आहे. दिल्लीच्या स्टाफमध्ये आधीपासूनच हेमांग बदानी आणि शेन वॉटसनसारखे खेळाडू आहेत. वृत्तानुसार, युवराज सिंग दिल्ली कॅपिटल्समध्ये कोचिंग कन्सल्टंट म्हणून सामील होईल. युवराजने अभिषेक शर्मा, प्रभसिमरन सिंग, प्रियांश आर्य आणि अब्दुल समद यांसारख्या खेळाडूंना मार्गदर्शन केले आहे, परंतु आतापर्यंत तो कोणत्याही औपचारिक प्रशिक्षण सेटअपचा भाग नव्हता.

युवराजने तरुण क्रिकेटपटूंसोबत, विशेषतः अभिषेक शर्मासोबत मार्गदर्शक म्हणून काम केले आहे, ज्याचा अभिषेकला आंतरराष्ट्रीय क्रिकेटमध्ये फायदा झाला आहे. वृत्तानुसार, युवी संघात सामील झाल्याने दिल्ली कॅपिटल्सला आनंद झाला आहे. आशिष नेहरा, झहीर खान आणि वीरेंद्र सेहवाग यांच्यासह युवीच्या अनेक माजी आयपीएल सहकाऱ्यांनी आयपीएलमध्ये प्रशिक्षक म्हणून काम केले आहे.

युवराज सिंगने 132 आयपीएल सामन्यांमध्ये 24.77 च्या सरासरीने 2,750 धावा केल्या आहेत. युवीने आयपीएलमध्ये आपल्या गोलंदाजीनेही उत्कृष्ट कामगिरी केली असून, दोन हॅट-ट्रिक घेण्याचा विक्रम त्याच्या नावावर आहे.

दिल्ली कॅपिटल्सने आजपर्यंत आयपीएलचे विजेतेपद जिंकलेले नाही. दिल्ली फ्रँचायझीकडे मोठा अनुभव आहे, परंतु संघाला यश मिळालेले नाही. त्यामुळे, युवीला करारबद्ध करणे हा दिल्ली कॅपिटल्ससाठी एक महत्त्वपूर्ण निर्णय आहे. युवीने एक मार्गदर्शक म्हणून स्वतःला सिद्ध केले आहे, विशेषतः तरुण खेळाडूंसोबत काम करण्याच्या त्याच्या आवडीमुळे. आयपीएलमध्ये दिल्ली कॅपिटल्सचे नशीब बदलेल की नाही हे पाहणे बाकी आहे.