सूरत पोलिसांच्या गुन्हे शाखेने सोमवारी एका कारचा पाठलाग करून 30 लाख रुपयांचे ड्रग्ज जप्त केले. या हायप्रोफाईल ड्रग्ज रॅकेटमध्ये विमानातील एका माजी कॅबिन क्रू सदस्याचा सहभाग समोर आला असून, तो बडोद्याहून मुंबईच्या दिशेने माल घेऊन चालला होता. पोलिसांनी आरोपीला ताब्यात घेतले असून या आंतरराज्य तस्करीचे धागेदोरे शोधले जात आहेत. गुजरातहून मुंबईत होणाऱ्या हायप्रोफाइल आंतरराज्य ड्रग्ज तस्करी प्रकरणाच्या तपासात आता एक अत्यंत धक्कादायक माहिती समोर आली आहे. सूरत गुन्हे शाखेने दिल्ली-मुंबई एक्सप्रेसवेवर 30 लाख रुपयांच्या मेफेड्रोन (MD) ड्रग्जसह अटक केलेल्या मलेशियन एअरलाईन्सच्या माजी एअर होस्टेस आणि तिच्या साथीदाराचा मुंबईत अंमली पदार्थ विकण्याचा संपूर्ण मास्टरप्लॅन उघड झाला आहे.
पोलिसांच्या चौकशीत समोर आले आहे की, जप्त केलेले ड्रग्ज मुंबईत पोहोचवल्यानंतर त्याचे 5 ते 10 ग्रॅमचे लहान पॅकेट्स (प्लास्टिक बॅग्स आणि कंटेनर्स) तयार केले जाणार होते आणि मुंबईतील वेगवेगळ्या भागात ग्राहकांच्या मागणीनुसार (Based on Demand) त्यांची किरकोळ विक्री केली जाणार होती.
याप्रकरणी पोलिसांनी मलेशियन एअरलाईन्सची माजी कॅबिन क्रू मेंबर मानसी सईद (वय 41) आणि तिचा जुना साथीदार सोहेल सुलेमान शेख (वय 20) या दोघांना अटक केली असून, ते दोघेही मुंबईच्या सांताक्रूझ परिसरातील रहिवासी आहेत.
टोल नाक्यावर फिल्मी स्टाईलने पकडले ड्रग्ज
सूरत पोलिसांच्या गुन्हे शाखेला सोमवारी एक खात्रीशीर गुप्त माहिती मिळाली होती की, बडोद्याहून एका भाड्याच्या कारमधून (Rented Car) मोठ्या प्रमाणावर मेफेड्रोन ड्रग्ज मुंबईच्या दिशेने नेले जात आहे. या माहितीच्या आधारे पोलिसांनी दिल्ली-मुंबई एक्सप्रेसवेवरील कामरेज टोल पोस्टजवळ सापळा रचला.
एक संशयास्पद पांढऱ्या रंगाची कार टोल नाक्यावर येताच पोलिसांनी ती थांबवली. कारची झडती घेतली असता, पोलिसांना कारमध्ये मानसी सईद आणि सोहेल शेख बसलेले आढळले. पोलिसांनी कसून तपासणी केली असता, कारमधून तब्बल 977 ग्रॅम (अंदाजे 1 किलो) उच्च दर्जाचे मेफेड्रोन (MD) ड्रग्ज जप्त करण्यात आले, ज्याची आंतरराष्ट्रीय बाजारपेठेतील किंमत सुमारे 30 लाख रुपये आहे. याशिवाय कारमधून ड्रग्ज पॅक करण्यासाठी आणलेल्या छोट्या प्लास्टिक पिशव्या, कंटेनर्स आणि अनेक मोबाईल फोन्स जप्त करण्यात आले आहेत.
रेल्वे स्टेशनजवळ अनोळखी महिलेकडून घेतली होती डिलिव्हरी
पोलिसांच्या कडक चौकशीदरम्यान दोन्ही आरोपींनी कबूल केले की, त्यांनी ही कार मुंबईतून भाड्याने घेतली होती आणि ते ड्रग्ज घेण्यासाठी बडोद्याला गेले होते. बडोदा रेल्वे स्टेशनजवळ एका अनोळखी महिलेने त्यांच्याकडे हा ड्रग्जचा साठा सुपूर्द केला होता. तिथून ते थेट एक्सप्रेसवेने मुंबईला परतत असताना सूरत पोलिसांच्या जाळ्यात अडकले.
पोलिसांनी सांगितले की, आरोपींनी ड्रग्ज लपवण्यासाठी आणि पोलिसांच्या अंमली पदार्थ शोधणाऱ्या श्वानांपासून वाचण्यासाठी लहान मुलांच्या डायपरचा वापर केला होता, जेणेकरून हायवेवर कौटुंबिक प्रवास सुरू असल्याचा बनाव करता येईल.
2015 पासून ड्रग्ज नेटवर्कमध्ये सक्रिय
तपासात असेही समोर आले आहे की, मुख्य आरोपी मानसी सईद ही 2015 पासूनच ड्रग्ज नेटवर्कच्या संपर्कात होती. सुरुवातीला ती स्वतः ‘एमडी’चे सेवन करायची, मात्र नंतर ती थेट तस्करीत सामील झाली. तिच्यावर यापूर्वीही गुन्हे दाखल असून, 2021 मध्ये इंदूर गुन्हे शाखेने तिला 100 ग्रॅम मेफेड्रोनसह अटक केली होती, ज्यासाठी तिने तब्बल 4 वर्ष तुरुंगात काढली होती. तुरुंगातून बाहेर येताच तिने पुन्हा सोहेलच्या मदतीने मुंबईत 5 ते 10 ग्रॅमचे पॅकेट्स करून विकण्याचे हे नवे रॅकेट सुरू केले होते.
Leave a Reply