बॉलिवूड इंडस्ट्रीत कास्टिंग काऊचच्या अनेक घटना ऐकायला मिळतात. आजवर अनेक अभिनेत्रींनी कास्टिंग काऊचचे धक्कादायक आरोप केले आहेत. अशाच एका प्रकरणात ‘बडे दिलवाला’ आणि ‘जोरू का गुलाम’ यांसारख्या चित्रपटांचे दिग्दर्शक आणि निर्माते शकील नूरानी (73 वर्षे) यांना मालवणी पोलिसांनी अटक केली आहे. एका 33 वर्षीय अभिनेत्रीने नूरानी यांच्याविरोधात बलात्कार आणि लैंगिक अत्याचाराचा गुन्हा दाखल केला होता. पोलिसांनी दिलेल्या माहितीनुसार, नूरानी यांनी नवीन चित्रपटावर चर्चा करण्याच्या बहाण्याने संबंधित अभिनेत्रीला मालवणी इथल्या त्यांच्या घरी बोलावलं होतं. अभिनेत्री त्यांच्या घरी गेली असता त्यांनी तिला गुंगीचं औषध दिलं आणि तिच्यावर लैंगिक अत्याचार केले. इतकंच नव्हे तर या घटनेचा खुलासा केल्यास व्हिडिओ व्हायरल करण्याची धमकीही नूरानी यांनी दिल्याचा आरोप पीडित अभिनेत्रीनं केला आहे.
नूरानी यांना 12 ऑगस्टपर्यंत पोलीस कोठडी
अभिनेत्रीच्या तक्रारीनंतर पोलिसांनी तांत्रिक तपासाद्वारे नूरानी यांचा शोध घेतला. सातारा जिल्ह्यातील मेढा इथल्या एका फार्महाऊसमधून त्यांना शनिवारी 8 ऑगस्ट 2027 रोजी पहाटे पोलिसांनी अटक केली. त्यानंतर त्यांना मुंबईत आणण्यात आलं. शकील यांना अटकेनंतर न्यायालयासमोर सादर केलं असता त्यांना 12 ऑगस्टपर्यंत पोलीस कोठडी सुनावण्यात आली आहे. मालवणी पोलिसांनी शकील नूरानी यांच्याविरोधात भारतीय दंड संहितेच्या (IPC) कलम 64(2)(m), 123, 351(2) आणि 88 अंतर्गत गुन्हा दाखल केला आहे.
कोण आहेत शकील नूरानी?
शकील नूरानी हे हिंदी चित्रपटसृष्टीतील ज्येष्ठ दिग्दर्शक आणि निर्माते आहेत. 1999 मध्ये प्रदर्शित झालेला ‘बडे दिलवाला’ आणि 2000 मध्ये प्रेक्षकांच्या भेटीला आलेला ‘जोरू का गुलाम’ हे त्यांच चित्रपट विशेष गाजले. नूरानी यांनी 1991 मध्ये प्रदर्शित झालेल्या ‘विष्णू देवा’ या चित्रपटातून बॉलिवूडमध्ये पदार्पण केलं होतं. ‘जोरू का गुलाम’ या चित्रपटात गोविंदा आणि ट्विंकल खन्ना यांनी मुख्य भूमिका साकारल्या होत्या. 2005 मध्ये प्रदर्शित झालेल्या ‘तेजाब: द अॅसिड ऑफ लव्ह’ या चित्रपटाचं दिग्दर्शन त्यांनीच केलं होतं. याप्रकरणी अद्याप शकील नूरानी यांच्याकडून कोणतीही प्रतिक्रिया समोर आली नाही.
Leave a Reply