मराठी सिनेविश्वातील दिग्गज कलाकार अशोक सराफ आणि निवेदिता सराफ यांच्या चाहत्यांची संख्या आज फक्त भारतात नाही तर, सातासमुद्रा पार देखील फार मोठी आहे. अशोक आणि निवेदिता सराफ यांनी अनेक सिनेमांमध्ये एकत्र स्क्रिन शेअर केली आणि दोघांच्या जोडीला प्रेक्षकांनी डोक्यावर घेतलं. फक्त ऑनस्क्रिनच नाही तर, ऑफस्क्रिन देखील दोघांनी चाहत्यांना कपल गोल्स दिले. कधीच लग्न करणार नाही… असं म्हणणारे अशोक सराफ कधी आणि कसे निवेदिता यांच्या प्रेमाच्या जाळ्यात अडकले आणि कसं दोघांचं नातं लग्नापर्यंत पोहोचलं याबद्दल कदाचित फार काही कोणाला माहिती नसेल. अशोक सराफ आणि निवेदिता यांना एकत्र आणण्यासाठी सर्वात मोठी भूमिका बजावली ती म्हणजे अभिनेते सचिन पिळगांवकर यांनी…
अशोक सराफ आणि निवेदिता सराफ यांच्या नात्याबद्दल सांगायचं झालं तर, त्यांची जोडी मराठी सिनेविश्वातील एव्हर ग्रीन जोडी आहे. अनेकांना दोघांची लव्हस्टोरी भावते. कुटुंबियांचा विरोध असताना देखील निवेदिता आपल्या निर्णयावर ठाम राहिल्या पण लग्न अशोक सराफ यांच्यासोबतच केलं. कुटुंबियांचा विरोध, प्रेमातील अडथळे दूर करत दोघांनी लग्न केलं आणि संसार थाटला. सांगायचं झालं तर, अशोक सराफ जेव्हा नाटक करायचे, तेव्हा निवेदिता सराफ त्यांच्या वडिलांसोबत नाट्यगृहात यायच्या. एवढंच नाही तर, वडिलांमुळे निवेदिता यांची अशोक सराफ यांच्यासोबत ओळख झाली. कालांतराने या ओळखीचं प्रेमात रुपांतर झालं.
जेव्हा अशोक सराफ यांचा अपघात झाला, तेव्हा त्यांनी कधीच लग्न न करण्याचा निर्णय घेतलेला. पण निवेदिता सराफ याचं अशोक यांच्यावर जीव जडलेला होता. त्यांनी कुटुंबियांना देखील सांगून ठेवलं होतं की, ‘लग्न करे तर अशोकशीच करेल…’, पण दोघांमध्ये 18 वर्षांचं अंतर असल्याने त्यांच्या नात्यासाठी कुटुंबियांचा विरोध होता. पण निवेदिता देखील दुसऱ्या कोणाशीच लग्न करण्यासाठी तयार नव्हत्या. तर अशोक सराफ देखील निवेदिता यांच्या प्रेमात होते. अखेर अभिनेते सचिन पिळगांवकर यांच्या मदतीने दोघांचं लग्न पार पडलं.
अशोक सराफ यांच्यासोबत लग्नाला, कुटुंबियांचा विरोध होता, पण निवेदिता सराफ यांच्या बहिणी देखील दोघांच्या लग्नासाठी पुढाकार घेतला आणि कुटुंबियांची समज घातली. अखेर कुटुंबियांनी देखील निवेदिता आणि अशोक सराफ यांच्या लग्नासाठी होकार दिला. त्यानंतर मंदिरात पारंपरिक पद्धतीने अशोक सराफ आणि निवेदिता सराफ यांचं लग्न झालं.
Leave a Reply