तीन वर्षांपूर्वी 2023 मध्ये ‘OMG 2’ हा चित्रपट प्रदर्शित होणार होता, तेव्हा सेन्सॉर बोर्डासोबत याचा मोठा वाद झाला होता. या चित्रपटात लैंगिक शिक्षणासोबत धार्मिक विषय मिसळल्यावरून आक्षेप नोंदवण्यात आला होता. यावर बंदी आणण्याचीही मागणी केली जात होती. अखेर काही बदलांनंतर ‘अ’ प्रमाणपत्रासह हा चित्रपट प्रदर्शित झाला. आता नुकत्याच दिलेल्या एका मुलाखतीत दिग्गज अभिनेते परेश रावल यांनी यावरून मोठा खुलासा केला आहे. ‘OMG 2’ या चित्रपटाची मूळ कल्पना माझीच होती, पण अक्षय कुमारने माझ्याकडून स्क्रिप्ट घेतली आणि मला श्रेयसुद्धा दिलं नाही, असा आरोप त्यांनी केला आहे.
OMG 2 ची संकल्पना
‘विकी लालवानी’ला दिलेल्या मुलाखतीत परेश रावल यांनी दावा केला की, त्यांनी या चित्रपटाच्या मूळ कथेबद्दल विचार केला होता, जो नंतर ‘OMG 2’ बनून थिएटरमध्ये आला. त्यांनी मूळ कल्पना दिग्दर्शक अमित राय यांना सांगितली होती आणि त्यांच्यासोबत मिळून पटकथा बनवली होती. मात्र नंतर जेव्हा अक्षय कुमार त्या प्रोजेक्टशी जोडला गेला, तेव्हा कथेच बरेच बदल करण्यात आले. याविषयी परेश रावल म्हणाले, “मी ‘रोड टू संगम’चे दिग्दर्शक अमित राय यांच्याशी संपर्क साधला आणि ते एखादा चित्रपट बनवण्याचा विचार करत आहेत का, असं विचारलं. मी त्यांना म्हटलं की माझ्याकडे एक कल्पना आहे. आपण दोघं बसून काहीतरी लिहुयात. मी त्यांना स्पष्ट केलं की, मी लेखक तर नाहीये, पण मी कल्पना चांगली देऊ शकतो. आपण कुठे चुकतोय हे ओळखण्यासाठी मी मदत करू शकतो. कारण मला स्क्रिनप्लेची थोडीफार समज आहे.”
अजय देवगण, सलमानशी संपर्क..
“मूळ संकल्पना हा चित्रपटापेक्षा खूप वेगळा होता. आमची मुख्य कल्पना हीच होती की मुलाच्या वडिलांना मार्ग दाखवणारा एखादा बाइकर असावा, देव नाही. पहिल्या ‘ओह माय गॉड’मध्ये देव यासाठी आले होते, कारण खटलाच देवाविरोधात होता. मात्र हा चित्रपट एका वडिलांचा त्यांच्या मुलाला न्याय मिळवून देण्याबाबत होता. यात कोणत्याच दैवी भूमिकेची गरज नव्हती. मी बाइकरच्या भूमिकेसाठी अजय देवगण आणि सलमान खान यांच्याशीही संपर्क साधला होता. मी अक्षयशी संपर्क साधला नव्हता, कारण मग लोकांना तो ‘OMG 2’ वाटला असता आणि आमचा तसा प्लॅनच नव्हता. काही दिवसांनंतर अमित राय यांनी मला फोन करून सांगितलं की अक्षयला हा चित्रपट करायचा आहे. इथे समस्या अशी होती की, अमितने स्क्रिप्टवर तात्पुरतं OMG 2 असं शीर्षक लिहिलं होतं, कारण जॉनर एकसारखाच होता. मी त्यांना म्हटलं की मला ही कथा पुढे न्यायची नाही. मी त्याच्याशी भांडू शकत नाही, कारण तो माझा मित्र आहे.. असं मी स्पष्ट दिग्दर्शकांना सांगितलं होतं” असा खुलासा परेश रावल यांनी केला.
देव कुठेच नव्हता..
परेश रावल त्यांच्या संकल्पनेवर ठाम होते, कारण त्यांना ‘ओह माय गॉड’चा सीक्वेल बनवायचा नव्हता, त्यांच्या कथेत कुठेच देवाचा सहभाग नव्हता. तरी त्यांना न जुमानता अक्षय कुमार आणि दिग्दर्शक पुढे काम करू लागले. अखेर परेश रावल यांनीच त्यातून माघार घेतली. याविषयी त्यांनी पुढे सांगितलं, “मी नंतर जेव्हा अक्षय कुमारशी बोललो, तेव्हा त्याने मला चित्रपटावर काम करण्यास सांगितलं होतं. पण मी थेट नकार दिला. कारण हा तो चित्रपट नव्हता, ज्याची मी कल्पना केली होती. माझ्या कथेत कुठेच देवाची भूमिका नव्हती. त्याने माझी मनधरणी करण्याचा प्रयत्न केला होता, पण मला मी सुरुवातीपासूनच त्या कथेशी जोडलेला होतो. ती कथा कशी हवी, याची मला पूर्ण कल्पना होती. त्यामुळे मी त्यातून बाहेर पडलो.”
श्रेयचं दिलं नाही
सर्वांत दु:खद गोष्ट ही आहे की मला कथा किंवा संकल्पनेचं कोणतंच श्रेय देण्यात आलं नव्हतं, अशा शब्दांत त्यांनी नाराजी बोलून दाखवली. “अमित राय, अक्षय कुमार, अश्विन, अजय देवगण, करण जोहर, सलमान खान.. सर्वांना माहित होतं की ही माझी कल्पना आणि कथा आहे. अजय आणि सलमानने कदाचित विषयामुळे नकार दिला असावा. त्यांना वाटलं असेल की हे वादग्रस्त ठरू शकतं”, असं परेश रावल यांनी सांगितलं.
‘ओह माय गॉड 2’ हा चित्रपट 50 कोटी रुपयांच्या बजेटमध्ये बनला होता आणि देशभरात त्याची कमाई 150.75 कोटी रुपयांची झाली होती. जगभरातील कलेक्शनचा आकडा 221.6 कोटींवर पोहोचला होता.
Leave a Reply