उन्हाळ्याच्या कडक उन्हामुळे आणि पावसाळ्यात अनेकजण चित्रपटगृहात जाण्यापेक्षा घरबसल्या मनोरंजनाला प्राधान्य देत आहेत. नेटफ्लिक्स, जिओ हॉटस्टार, ॲमेझॉन प्राइम व्हिडिओ, झी 5 आणि सोनी लिव यांसारख्या ओटीटी प्लॅटफॉर्मवर भरपूर चित्रपट उपलब्ध असले तरी त्यासाठी सशुल्क सदस्यत्व घ्यावे लागते. मात्र, मोफत चित्रपट पाहण्यासाठी आजही यूट्यूब हा सर्वात लोकप्रिय पर्याय मानला जातो.
अशाच यूट्यूबवर प्रचंड लोकप्रिय ठरलेल्या एका हिंदी डब चित्रपटाने तब्बल 100 कोटींहून अधिक व्ह्यूज मिळवत विक्रमी कामगिरी केली आहे. हा चित्रपट म्हणजे ‘जय जानकी नायक’, जो हिंदी प्रेक्षकांमध्ये ‘खूंखार’ या नावाने प्रदर्शित करण्यात आला होता.
7 वर्षांत 100 कोटी व्ह्यूजचा विक्रम
पेन मूव्हीजच्या अधिकृत यूट्यूब चॅनेलवर सुमारे सात वर्षांपूर्वी हा चित्रपट अपलोड करण्यात आला होता. त्यानंतर या चित्रपटाला प्रेक्षकांनी भरभरून प्रतिसाद दिला. आज या चित्रपटाने 100 कोटी पेक्षा अधिक व्ह्यूजचा टप्पा गाठला असून हिंदी डब दक्षिण भारतीय चित्रपटांच्या लोकप्रियतेचे हे मोठे उदाहरण मानले जात आहे.
‘जय जानकी नायक’ची कथा गगन आणि स्वीटी या दोन तरुणांच्या प्रेमाभोवती फिरते. दोघे एकमेकांच्या प्रेमात पडतात. मात्र, स्वीटीच्या वडिलांना हे नाते मान्य नसल्यामुळे त्यांचे मार्ग वेगळे होतात. काही काळानंतर गगन नकळत स्वीटी आणि तिच्या कुटुंबाचे संकटातून रक्षण करतो. त्यानंतर त्यांच्या सुरक्षेची जबाबदारी स्वीकारत तो अनेक आव्हानांना सामोरा जातो. प्रेम, ॲक्शन, कौटुंबिक भावना आणि थरार यांचा संगम असलेली ही कथा प्रेक्षकांना खिळवून ठेवते.
बॉक्स ऑफिसवर ठरला अपयशी
सुमारे 30 कोटी रुपयांच्या बजेटमध्ये तयार झालेल्या या चित्रपटाने जगभरात 36.85 कोटी रुपयांची कमाई केली होती. अपेक्षित यश न मिळाल्याने हा चित्रपट बॉक्स ऑफिसवर फ्लॉप मानला गेला. तसेच IMDb वर या चित्रपटाला 10 पैकी 5.2 इतके रेटिंग मिळाले आहे.
चित्रपटगृहात अपेक्षित यश न मिळाल्यानंतरही हिंदी डब आवृत्तीमुळे ‘जय जानकी नायक’ला यूट्यूबवर जबरदस्त प्रतिसाद मिळाला. दमदार ॲक्शन, भावनिक कथा आणि मनोरंजक सादरीकरणामुळे हा चित्रपट आजही मोठ्या प्रमाणात पाहिला जात आहे. विशेष म्हणजे 100 कोटींहून अधिक व्ह्यूज मिळवणाऱ्या मोजक्या हिंदी डब दक्षिण भारतीय चित्रपटांमध्ये त्याची गणना केली जाते.
Leave a Reply