हिंदी चित्रपटसृष्टीतील पहिले सुपरस्टार म्हणून ओळखले जाणारे राजेश खन्ना यांनी आपल्या अभिनयासोबतच रोमँटिक शैलीने प्रेक्षकांच्या मनावर अधिराज्य गाजवले आहे. त्यांच्या अनेक चित्रपटांतील गाणी आजही प्रेक्षकांच्या ओठांवर कायम आहेत.
त्यापैकी 'मेरे सपनों की रानी कब आएगी तू' हे गाणं तब्बल 57 वर्षांनंतरही चाहत्यांमध्ये प्रचंड लोकप्रिय आहे. हे सदाबहार गाणं 1969 मध्ये प्रदर्शित झालेल्या 'आराधना' या चित्रपटातील असून यात राजेश खन्ना आणि शर्मिला टागोर यांची जोडी झळकली होती.
या गाण्याचे बोल प्रसिद्ध गीतकार आनंद बक्षी यांनी लिहिले असून संगीत दिग्दर्शक सचिन देव बर्मन यांनी ते संगीतबद्ध केले आहे. तर गायक किशोर कुमार यांच्या मोहक आवाजामुळे हे गाणं अजरामर ठरले. गाण्याचे चित्रिकरणही तितकेच खास आहे.
दार्जिलिंगच्या प्रसिद्ध टॉय ट्रेनमध्ये प्रवास करणाऱ्या शर्मिला टागोर यांच्या मागे कारने जात राजेश खन्ना त्यांना आपल्या खोडकर आणि रोमँटिक अंदाजात गाणं गाताना दिसतात. दोघांच्या नजरेतून व्यक्त होणारे प्रेम आणि राजेश खन्नांचा दिलखुलास अभिनय यामुळे हे गाणं आजही प्रेक्षकांच्या मनात ताजे आहे.
'आराधना' हा चित्रपट त्या काळातील सर्वात यशस्वी चित्रपटांपैकी एक ठरला. चित्रपटाने बॉक्स ऑफिसवर मोठे यश मिळवले आणि त्यातील जवळपास सर्वच गाणी सुपरहिट झाली.
Leave a Reply