‘देऊळ बंद 2’ने ‘राजा शिवाजी’ या चित्रपटाला मागे टाकावं, अशी माझी इच्छा नाही, असं वक्तव्य दिग्दर्शक, अभिनेते प्रवीण तरडे यांनी केलं होतं. मात्र नफा कमावण्याच्या दृष्टीने या चित्रपटाने रितेश देशमुखच्या ‘राजा शिवाजी’ या चित्रपटाला मागे टाकलं आहे. बॉक्स ऑफिसवर मराठी चित्रपटांची एकमेकांशी टक्कर होत असली तरी सध्याचं चित्र अत्यंत सकारात्मक असल्याचं दिसतंय. कारण ‘राजा शिवाजी’, ‘देऊळ बंद 2’, ‘तुंबाडची मंजुळा’ आणि आता ‘घबाडकुंड’ या चित्रपटांनी बॉक्स ऑफिसवर दमदार कमाई केली आहे. विशेष म्हणजे यापैकी ‘देऊळ बंद 2’ या चित्रपटाच्या प्रदर्शनाला महिना उलटून गेला तरी अद्याप चित्रपटाला प्रेक्षकांकडून चांगला प्रतिसाद मिळतोय. 21 मे 2026 रोजी हा चित्रपट थिएटरमध्ये प्रदर्शित झाला.
‘देऊळ बंद 2’ची आतापर्यंतची कमाई
‘देऊळ बंद 2’ या चित्रपटाने आतापर्यंत तब्बल 622 टक्के नफा कमावला आहे. अर्थात ही टक्केवारी खूपच जास्त आहे, कारण या चित्रपटाचा बजेट अत्यंत सर्वसामान्य आहे. अवघ्या दहा कोटी रुपयांच्या बजेटमध्ये बनलेल्या या चित्रपटाने भारतात 72 कोटींच्या आसपास कमाई केली आहे. तर जगभरातील कलेक्शनचा आकडा 93.50 कोटी रुपयांवर पोहोचला आहे. सध्या हा चित्रपट सर्वाधिक कमाई करणाऱ्या मराठी चित्रपटांच्या यादीत चौथ्या स्थानावर आहे. प्रदर्शनाच्या अवघ्या तीन दिवसांत या चित्रपटाने बजेटचा आकडा पार केला होता. आता हा चित्रपट 100 कोटींचा टप्पा गाठतो का, हे पाहणं औत्सुक्याचं ठरणार आहे. रितेश देशमुखच्या ‘राजा शिवाजी’ या चित्रपटाने मराठी व्हर्जनमध्ये 130 कोटी रुपयांची कमाई केली होती.
स्नेहल तरडे आणि मोहन जोशी यांच्या ‘देऊळ बंद 2’ने दमदार बॉक्स ऑफिस परफॉर्मन्स करत सर्वांनाच चकीत केलं आहे. एखादा मराठी चित्रपट थिएटर्समध्ये इतक्या काळापर्यंत चालणं ही काही सर्वसामान्य बाब नाही. कारण मराठी चित्रपटांना शोज मिळत नसल्याची तक्रार आधीपासूनच केली जात आहे. अशातच इतर चित्रपट शर्यतीत येत असतानाही ‘देऊळ बंद 2’चे शोज चांगले चालत आहेत. या चित्रपटाला ‘तुंबाडची मंजुळा’ आणि ‘घबाडकुंड’ यांची टक्कर मिळत आहे. तरीसुद्धा प्रदर्शनाच्या पाचव्या आठवड्यातही प्रवीण तरडेंच्या चित्रपटासाठी थिएटरमध्ये गर्दी होत आहे.
Leave a Reply