छोट्या पडद्यावरील अतिशय लोकप्रिय मालिकांच्या यादीमधील एक मालिका म्हणजे आई कुठे काय करते. या मालिकेतील प्रत्येक पात्राने प्रेक्षकांच्या मनात घर केले आहे. दरम्यान, या मालिकेत काम करणाऱ्या एका अभिनेत्रीचा घटस्फोट झाल्याच्या चर्चा रंगल्या होत्या. आता यावर अभिनेत्रीने मौन सोडले आहे. तिने स्वत: घटस्फोट झाल्याचे सांगितले आहे.
आम्ही ज्या अभिनेत्रीविषयी बोलत आहोत तिचे नाव अक्षया गुरव आहे. तिने आई कुठे काय करते' या मालिकेत मायाची भूमिका साकारली होती. आता माया तिच्या खासगी आयुष्यामुळे चर्चेत आहे. अक्षयाने 2017मध्ये दिग्दर्शक भूषण वाणीशी लग्न केले होते. मात्र, 8 वर्षांच्या संसारानंतर त्यांनी वेगळे होण्याचा निर्णय घेतला.
अक्षयाने नुकताच दिलेल्या एका मुलाखतीमध्ये घटस्फोटाच्या चर्चांना खरे असल्याचे सांगितले. “माझ्या वैयक्तिक आयुष्याबाबत चर्चा झाली, त्यामुळे सुरुवातीला मला हे सगळं पटलं नाही. पण नंतर कुठेतरी वाटलं की, आपल्याला याबद्दल कधीतरी बोलावंच लागेल. जे काही लोकांनी वाचलंय, पाहिलंय तर ती गोष्ट खरी आहे” असे म्हटले.
पुढे ती म्हणाली, खूप त्रास होतो, मी रडलेय… वाईट वाटतं पण, आपलं आयुष्य इथेच थांबत नाही. कलाकार असल्याने त्याकडे लक्ष ठेवावं लागतं कारण ते आपल्या चेहऱ्यावर दिसतं. म्हणूनच मी माझं वैयक्तिक आयुष्य आणि प्रोफेशनल आयुष्य वेगळं ठेवते.
या मुलाखतीत अक्षयाने आम्ही दोघे आजही खूप चांगले मित्र आहोत असे सांगितले आहे. तिने भविष्यात संधी मिळाली तर एकत्र काम देखील करु असे म्हटले.
Leave a Reply