गेल्या काही दिवसांपासून सोशल मीडियावर कॉकरोच जनता पार्टी प्रचंड व्हायरल होत आहे. CJP ने फॉलोअर्सच्या बाबत भाजप आणि काँग्रेसलाही मागे टाकले आहे. मात्र आता भाजपने मोठा दावा केला आहे. या संघटनेच्या सोशल मीडिया फॉलोअर्समध्ये मोठ्या प्रमाणात पाकिस्तानमधील लोकांचा समावेश आहे असं भाजपने म्हटलं आहे. केंद्रीय मंत्री सुकांत मजूमदार यांनी सांगितले की, ‘CJP चे सुमारे 49 टक्के फॉलोअर्स पाकिस्तानमधून आहेत, तर भारतातून फक्त 9 टक्के लोकच या मोहिमेला फॉलो करत आहेत.’ भाजप नेत्यांनी सोशल मीडियाच्या माध्यमातून भारतात एक खोटे कथानक तयार केले जात आहे असं विधान केले आहे.
भाजपचा गंभीर आरोप
भाजपच्या आरोपांनंतर हा मुद्दा अधिक चर्चेत आला आहे. भाजपच्या केरळ युनिटचे अध्यक्ष राजीव चंद्रशेखर यांनीही सोशल मीडिया प्लॅटफॉर्म X वर पोस्ट करत CJP वर प्रश्न उपस्थित केले आहेत. त्यांनी म्हटले की, ‘आजच्या काळात बॉट्स, आर्टिफिशियल इंटेलिजन्स आणि डिजिटल प्रचाराचा वापर करून देशांना अस्थिर करण्याचे प्रयत्न केले जातात. त्यांनी असेही सांगितले की, पंतप्रधान नरेंद्र मोदी यांच्या नेतृत्वाखाली भारताची वाढती ताकद अनेक विदेशी हितसंबंधांना प्रभावित करत आहे आणि अशा मोहिमा त्याचाच एक भाग असू शकतात. मात्र विकसित भारत होण्यापासून देशाला कोणीही रोखू शकत नाही असंही भाजप नेत्यांनी म्हटलं आहे.
अभिजीत दिपके यांच्या सोशल मीडिया अकाउंट्सवर कारवाई
कॉकरोच जनता पार्टीचे संस्थापक अभिजीत दिपके यांनी शनिवारी त्यांच्या डिजिटल संघटनेविरोधात कारवाई करण्यात आल्याचा आरोप केला आहे. दिपके यांनी सांगितले की, ‘अनेक अकाउंट्स हटवणे आणि हॅकिंगच्या घटनांनंतर आता संघटनेला कोणत्याही सोशल मीडिया अकाउंटचा वापर करता येत नाही. माझे वैयक्तिक इन्स्टाग्राम अकाउंटही हॅक करण्यात आले आहे. यापूर्वी भारतात CJP चे X अकाउंट ब्लॉक करण्यात आले होते, त्यानंतर त्यांनी नवीन अकाउंट तयार केले होते.
वेबसाईटवरही कारवाई
समोर आलेल्या माहितीनुसार CJP ने शिक्षण क्षेत्रातील अपयश आणि NEET-UG प्रश्नपत्रिका लीक प्रकरणावरून केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी करत मोहीम सुरू केली होती. त्यानंतर दिपके यांनी दावा केला की, त्यांना जीवे मारण्याच्या धमक्या दिल्या जात आहेत. त्यांनी धमकीचे स्क्रीनशॉट्सही शेअर केले होते. तसेच त्यांची वेबसाईटही बंद करण्यात आल्याचा आरोप दिपके यांनी केला होता.
Leave a Reply