Vinod Kambli : भारताचा माजी डावखुरा फलंदाज विनोद कांबळी पुन्हा एकदा चर्चेत आला आहे. विनोद कांबळीला रुग्णालयात दाखल करण्यात आलं आहे. त्याची प्रकृती चिंताजनक असल्याचं सांगण्यात येतंय. विनोदला ब्रेनस्ट्रोकचा धोका असल्याचंही सांगितलं जात आहे. त्यामुळे त्याच्या चाहत्यांमध्ये अस्वस्थता पसरली आहे. गेल्या तीन दिवसापासून विनोद रुग्णालयात उपचार घेत आहेत. त्याचे मित्र त्याची काळजी घेत आहे. आता त्याची पत्नी अँड्रिया हेविटने त्याच्या प्रकृतीबाबतची महत्त्वाची अपडेट दिली असून त्यामुळे त्याच्या चाहत्याचा जीव भांड्यात पडला आहे.
विनोद कांबळीला पुन्हा रुग्णालयात उपचारासाठी दाखल केल्याची बातमी पसरल्यानंतर सचिन तेंडुलकरसह विनोदच्या जवळच्या मित्रांनी त्याच्या मदतीसाठी हात पुढे केला आहे. अनेकांनी त्याच्यासाठी फंडिंग जमा केल्याचं वृत्त आहे. विनोदचा अत्यंत जवळचा मित्र मार्कस काउटो याने विनोदच्या मदतीचं सर्वात पहिलं आवाहन केलं. त्यानेच विनोदचे सर्व जुने मित्र आणि विनोदच्या चाहत्यांना एकत्र आणलं. मात्र, विनोद कांबळीची प्रकृती अत्यंत चिंताजनक असल्याच्या बातम्या येऊ लागल्या. त्यामुळे सर्वांनाच चिंता लागून राहिली. या सर्व बातम्यांच्या पार्श्वभूमीवर विनोदची पत्नी अँड्रिया हेविटने स्वत: समोर येऊन विनोदच्या प्रकृतीची अपडेट दिली आहे.
विनोदची तब्येत कशी?
इंडिया टुडेने दिलेल्या वृत्तानुसार, अँड्रियाने दिलासा देणारी माहिती दिली आहे. देवाच्या कृपेने विनोद ठणठणीत आहे. विनोदच्या प्रकृतीबाबत लोक चुकीच्या बातम्या का देतात? कोण अशा बातम्या पसरवतं? हे मला कळत नाही, असं अँड्रियाने म्हटलं आहे. अँड्रियाने स्वत: हेल्थ अपडेट दिल्याने आता विनोदच्या प्रकृतीबाबत उडणाऱ्या अफवांना पूर्णविराम मिळाला आहे.
या आधी आलेल्या एका वृत्तानुसार मार्कस काउटोने एक व्हॉट्सअप ग्रुप तयार केला आहे. कांबळी अडचणीत असल्याने त्याला आर्थिक मदत व्हावी म्हणून मार्कस प्रयत्न करत असल्याचंही सांगितलं जात होतं.
मार्कसने दिली बातमी
मार्कसनेच विनोदला आर्थिक मदत व्हावी म्हणून एक व्हॉट्सअप ग्रुप तयार केल्याचं सांगितलं होतं. विनोदच्या स्मरणशक्तीवर परिणाम झाल्याचा दावाही त्याने केला होता. गेल्या सहा महिन्यापासून विनोदला हा त्रास असून तो कमी झाला नाही, असंही त्याने म्हटलं होतं.
मार्कसने हिंदुस्तान टाइम्सशी संवाद साधला होता. त्यावेळी त्याने ही माहिती दिली होती. आम्ही विनोदच्या सर्व मित्रांनी एक व्हाट्सअप ग्रुप तयार केला आहे. आम्ही नाव न घेता विनोदला आर्थिक मदत करत आहोत. गेल्या सहा महिन्यापासून विनोदच्या स्मरणशक्तीवर परिणाम झाला आहे. त्याला काहीच आठवत नाहीये. पण त्याला अचानक क्लिक झाल्यावर सर्व आठवतं. नाही तर त्याच्यासाठी आठवणं कठिण होऊन जातं, असं मार्कसने म्हटलं होतं.
पुढची स्टेप ब्रेन स्ट्रोकची होऊ शकते, असं डॉक्टरांचं म्हणणं आहे. विनोदने दारू पिणं बंद केलं आहे. पण कधी कधी बिल्डिंगच्या खाली गेल्यावर जवळून येणाऱ्या जाण्याऱ्यांकडे तो सिगारेट मागतो, असंही त्यांनी म्हटलं होतं.
Leave a Reply