Vidarbha Pro T20 League : 1 ओव्हरमध्ये 33 रन्स, फलंदाजाचं वादळी शतक, पहिल्याच सामन्यात धमाका

आयपीएल स्पर्धेतील 19 व्या मोसमाची यशस्वी सांगता झाली. मात्र त्यानंतरही टी 20 क्रिकेट लीगचा थरार सुरुच आहे. मुंबई टी 20 लीग आणि विदर्भ प्रो टी20 लीग स्पर्धेला 1 जूनपासून सुरुवात झाली आहे. या टी 20 लीग स्पर्धेत अनेक स्टार खेळाडू सहभागी झाले आहेत. विदर्भ प्रो टी20 लीग स्पर्धेतील सलामीच्या सामन्यातच क्रिकेट चाहत्यांना धमाका पाहायला मिळाला. सलामीच्या सामन्यात एनईसीओ मास्टर ब्लास्टर्स विरुद्ध पगारिया स्ट्रायकर्स आमनेसामने होते. आयपीएल स्पर्धेत आरसीबीचं प्रतिनिधित्व करणाऱ्या गोलंदाजाची विदर्भ प्रो टी20 लीग 2026 स्पर्धेतील सलामीच्या सामन्यात जोरदार धुलाई करण्यात आली आहे. आरसीबीसाठी 7 सामने खेळून 6 विकेट्स मिळवणाऱ्या गोलंदाजाने विदर्भ प्रो टी20 लीग स्पर्धेत इतक्या धावा दिल्या की रेकॉर्ड झाला.

पगारिया स्टायकर्स टीमने मोसमातील सलामीच्या सामन्यात एनईसीओ मास्टर ब्लास्टर्सचा 5 विकेट्सने धुव्वा उडवला. रवीकुमार समर्थ हा पगारिया स्टायकर्सच्या विजयाचा हिरो ठरला. रवीकुमार याने पहिल्याच सामन्यात झंझावाती शतक झळकावलं.

एकाच षटकात 33 धावा, तुषार कडूचा झंझावात

एनईसीओ मास्टर ब्लास्टर्सने 200 पार मजल मारली. एनईसीओ मास्टर ब्लास्टर्सने टीमने 20 ओव्हरमध्ये 8 विकेट्स गमावून 219 धावा केल्या. तुषार कडू याने टीमला 219 धावांपर्यंत पोहचवण्यात प्रमुख भूमिका बजावली. तुषारने फक्त 26 चेंडूत 87 धावा ठोकल्या. तुषारने या दरम्यान 87 पैकी 80 धावा 15 चेंडूत केल्या. तुषारने 10 षटकार आणि 5 चौकार लगावले. तसेच तुषारने या दरम्यान एका ओव्हरमध्ये 33 धावा ठोकल्या. तुषार यासह स्पर्धेच्या इतिहासात एका ओव्हरमध्ये सर्वाधिक धावा करणारा पहिला फलंदाज ठरला.

तुषारने डावातील सहाव्या ओव्हरमध्ये 4 सिक्स, 2 फोर आणि सिंगलसह एकूण 33 धावा केल्या. तुषारने स्वप्निल सिंग याने टाकलेल्या ओव्हरमध्ये ही विक्रमी कामगिरी केली. स्वप्निलने आयपीएल स्पर्धेत आरसीबीचं प्रतिनिधित्व केलं आहे. स्वप्निलने 2024 साली आयपीएल स्पर्धेत आरसीबीकडून खेळताना 7 सामन्यांत 6 विकेट्स मिळवल्या होत्या.

पगरिया स्ट्रायकर्सची विजयी सलामी

दरम्यान रवीकुमार याने केलेल्या शतकाच्या जोरावर पगरिया स्ट्रायकर्सने जबरदस्त विजय मिळवला. पगरिया स्ट्रायकर्सने 220 धावांचं आव्हान हे 7 बॉलआधी पूर्ण केलं. पगरिया स्ट्रायकर्सने 18.5 ओव्हरमध्ये 5 विकेट्स गमावून 223 धावा केल्या. रवीकुमार याने फक्त 55 बॉलमध्ये नॉट आऊट 101 रन्स केल्या आणि टीमला जिंकवलं.