Vaibhav Sooryavanshi: बॉलरचा त्या एका चेंडूसमोर वैभवचा सगळा तोरा फिका, इंग्लंडविरुद्ध फेल होण्यामागचे कारण आलं समोर

भारत आणि इंग्लंडमध्ये सुरु असलेल्या मालिकेत भारतीय संघाची अतिशय निराशाजनक कामगिरी पाहायला मिळाली. भारतीय संघ सध्या अनेक बदलातून जात आहे. संघात अनेक युवा खेळाडूंचा समावेश करण्यात आला आहे. भारतीय संघाची धुराही सध्या नवीन कर्णधाराच्या हाती असल्यामुळे संघात अनेक नवीन निर्णयाचा खेळाडूंवर परिणाम होत असणार. आता वैभव सूर्यवंशीलही अवघ्या 15 वयाचा असूनही पदार्पण मिळाले आहे. त्याचे पदार्पण भारतीय संघाचा निकाल बदलेल असे वाटले होते पण तसे काही पाहायला मिळाले नाही. आता वैभवसारख्या फलंदाजाला अशी अडचण कशी येऊ शकते, तो कसा काय सलग दोनवेळा कमी धावा करुन बाद होऊ शकतो यामागे काय कारण आहे ते पाहा…

टीम इंडियाचा 15 वर्षीय स्फोटक फलंदाज, वैभव सूर्यवंशी, इंग्लंडमध्ये मैदानात उतरल्यापासून पूर्णपणे शांत आहे. वैभवने आतापर्यंत टीम इंडियासाठी दोन सामने खेळले असून, दोन्ही सामन्यांमध्ये त्याने 20 पेक्षा कमी धावा केल्या आहेत. याउलट, आयपीएलमध्ये त्याने सातत्याने एकापाठोपाठ एक अर्धशतके झळकावली होती. परिणामी, एका हंगामात 776 धावा करणाऱ्या या युवा फलंदाजाला इंग्लंडमध्ये अद्याप चांगली कामगिरी करता आलेली नाही.  आयपीएलबद्दल बोलायचे झाल्यास, या स्पर्धेवर बीसीसीआयचे पूर्ण नियंत्रण आहे. बीसीसीआय चाहत्यांसाठी सपाट खेळपट्ट्या तयार करते, ज्यामुळे मोठे फटके मारण्यास आणि भरपूर धावा करण्यास वाव मिळतो. फलंदाजांना या सपाट खेळपट्ट्यांवर खेळायला आवडते आणि वैभवने याचा पुरेपूर फायदा घेतला. आयपीएल 2026 च्या हंगामात वैभवने शानदार फलंदाजी करत 776 धावा केल्या आणि ऑरेंज कॅप जिंकली. परंतु आंतरराष्ट्रीय क्रिकेटमध्ये पदार्पण केल्यापासून तो कोणताही महत्त्वपूर्ण प्रभाव पाडू शकलेला नाही. यामागे इंग्लंडमधील खेळपट्ट्या हे एक प्रमुख कारण मानले जाते.

इंग्लंडमध्ये तयार केलेल्या खेळपट्ट्या अत्यंत कठीण असतात आणि त्या वेगवान गोलंदाजांना अनुकूल असतात. वेगवान गोलंदाजांना स्विंग आणि सीम दोन्ही मिळतात. शिवाय, स्विंग आणि सीममुळे चेंडूला अतिरिक्त उसळी मिळते, ज्यामुळे बाहेरच्या बाजूला स्विंग होणारे चेंडू खेळणे कठीण होते. वैभव सूर्यवंशी फलंदाजीसाठी मैदानात उतरल्याबरोबरच वेगवान गोलंदाजांनी त्याला ऑफ स्टंपच्या बाहेर चेंडू टाकून त्रास दिला. इतकेच नाही, तर इंग्लंडने त्याच्याविरुद्ध एक विशेष योजना आखली आहे.

जेव्हा वैभवने पदार्पण केले, तेव्हा सुरुवातीला वेगवान गोलंदाजांनी त्याला त्रास दिला. त्यानंतर इंग्लंडने फिरकी गोलंदाजांना मैदानात उतरवले आणि पदार्पणाच्याच सामन्यात विल जॅक्सच्या गोलंदाजीवर मोठा फटका मारण्याच्या प्रयत्नात तो यष्टीचीत झाला. त्यानंतर दुसऱ्या सामन्यात जोफ्रा आर्चरने त्याला पायचीत केले. वैभव अजूनही इंग्लंडच्या वेगवान खेळपट्ट्यांशी जुळवून घेण्यासाठी संघर्ष करत आहे. तो त्याच्या दिशेने येणाऱ्या प्रत्येक चेंडूवर मुक्तपणे फटकेबाजी करतो, पण जसा त्याचा टायमिंग किंवा संपर्क चुकतो, तसा तो बाद होतो. त्याची फटकेबाजीची शैली आंतरराष्ट्रीय स्तरावर अद्याप प्रभावी ठरलेली नाही. वैभवने पहिल्या सामन्यात 14 आणि दुसऱ्या सामन्यात 13 धावा केल्या. तो 9 जुलै रोजी होणाऱ्या चौथ्या टी20 सामन्यातही खेळताना दिसू शकतो.