अमेरिकेचे भारतातील राजदूत सर्जियो गोर यांनी जम्मू-काश्मीर संदर्भात एक मोठं वक्तव्य केलं. जम्मू-काश्मीर भारताचा अविभाज्य भाग असल्याचं गोर म्हणाले. अमेरिकन राजदूत हे मोठं पद आहे. अशा व्यक्तीने जम्मू-काश्मीर भारताचा अविभाज्य भाग आहे, असं म्हणणं हे पाकिस्तानसाठी झटका आहे. सर्जियो गोर यांनी हे वक्तव्य केल्यापासून पाकिस्तानने नुसता थयथयाट सुरु केला आहे. पाकिस्तानचा जळफळाट होत आहे. सर्जियो गोर यांनी श्रीनगरमध्ये हे वक्तव्य केलं. त्यांच्या या वक्तव्यानंतर पाकिस्तानने त्यांच्या देशातील अमेरिकन राजनैतिक अधिकाऱ्याला तलब केलं. पाकिस्तानने या वक्तव्याला बेजबाबदार ठरवलं आहे. जम्मू-काश्मीर हे वादग्रस्त क्षेत्र आहे हा आपला जुना राग पाकिस्तानने आळवला आहे. त्यावर संयुक्त राष्ट्र सुरक्षा परिषदेच्या प्रस्तावाचं पालन करुनच तोडगा निघेल असं पाकिस्तानचं म्हणणं आहे.
भारतातील अमेरिकन राजदूत सर्जियो गोर जम्मू-काश्मीर दौऱ्यावर आले होते. त्यावेळी ते जम्मू-काश्मीर भारताचा भाग आहे असं म्हणाले. इतकचं नाही, त्यांनी जम्मू-काश्मीरच्या सौंदर्याचं कौतुक केलं. अमेरिकेची जम्मू-काश्मीरशी संबंधित Travel Advisory ची समीक्षा आणि ती downgrade करण्याच्या मुद्यावर सुद्धा ते बोलले. हा खूप सुंदर भूप्रदेश आहे. अमेरिकी नागरिकांना इथे येऊन या भागाचं सौंदर्य पहायला आवडेल असं ते म्हणाले.
पाकिस्तानने काय म्हटलं?
काल 19 ऑगस्टला पाकिस्तानी परराष्ट्र मंत्रालयाने एक वक्तव्य केलं. पाकिस्तानने अमेरिकेच्या Charge dAffaires ला तलब केलं आणि अमेरिकी राजदूत सर्जियो गोर यांच्या वक्तव्यावर तीव्र आक्षेप नोंदवला. पाकिस्तानने अमेरिकी राजदूताच्या टिप्पणीला तथ्यात्मक दृष्टया चुकीचं ठरवत जम्मू-काश्मीर भारताचा अविभाज्य भाग असल्याचं अमान्य केलं.
अमेरिकेला काय म्हटलं?
पाकिस्तानने त्यांच्या स्टेटमेंटमध्ये अमेरिकेला त्यांच्या जुन्या काश्मीर धोरणाची आठवण करुन दिली. पाकिस्तान गोर यांच्या वक्तव्याने अस्वस्थ झाला आहे. “जम्मू-काश्मीर संदर्भात अमेरिकन राजदूताची टिप्पणी ही अमेरिकेच्या दीर्घकाळापासून धोरणाशी सुसंगत नाहीय. भविष्यात जम्मू-काश्मीर संदर्भात अमेरिकेची वक्तव्य ही पाकिस्तानच्या वादग्रस्त भूमिकेशी सुसंगतच असली पाहिजेत” असं पाकिस्तानने अमेरिकेला सांगितलं.
ट्रम्प यांनी दिलेला मध्यस्थतेचा प्रस्ताव
मध्यंतरी अमेरिकेचे राष्ट्राध्यक्ष डोनाल्ड ट्रम्प यांनी भारत-पाकिस्तान दरम्यान मध्यस्थतेचा प्रस्ताव दिला होता. पाकिस्तानने त्याचा सुद्धा कालच्या स्टेटमेंटमध्ये उल्लेख करत कौतुक केलं. पाकिस्तानने एकीकडे अमेरिकन राजदूतच्या वक्तव्यावर अमेरिकन राजनैतिक अधिकाऱ्याला तलब केलं. दुसरीकडे ट्रम्प यांच्या मध्यस्थतेच्या प्रस्तावाची अमेरिकेला आठवण करुन दिली.
भारताची भूमिका काय?
जम्मू-काश्मीर हे भारताचं अविभाज्य अंग आहे आणि तो आमचा अंतर्गत विषय आहे ही भारताची सुरुवातीपासून भूमिका राहिली आहे. काश्मीर मुद्याचं आंतरराष्ट्रीयकरण करण्याची पाकिस्तानची जुनी रणनिती आहे. भारतातील अमेरिकन राजदूताच्या या वक्तव्याने पाकिस्तानला चांगल्याच मिर्च्या झोंबल्या आहेत. त्यामुळे इस्लामाबादमध्ये कूटनितीक घडामोडी वाढल्या आहेत.
Leave a Reply