ही बातमी तुमच्यासाठी महत्त्वाची आहे. जर तुमचेही स्टेट बँकेत खाते असेल, तर ही बातमी तुमच्यासाठी अत्यंत महत्त्वाची आहे. एसबीआयने 1 ऑक्टोबरपासून रोख रक्कम काढण्याचे नियम आणि शुल्क बदलण्याचा निर्णय घेतला आहे. बेसिक सेव्हिंग्स बँक डिपॉझिट (BSBD) खातेधारकांसाठी महिन्यातील पहिल्या 4 मोफत व्यवहारानंतर पुढील प्रत्येक कॅश विड्रॉव्हलसाठी 15 रुपये शुल्क आकारले जाईल. देशातील सर्वात मोठी सरकारी बँक असलेल्या स्टेट बँक ऑफ इंडियाने (SBI) आपल्या कोट्यवधी ग्राहकांना सणासुदीच्या काळात मोठा आर्थिक झटका दिला आहे. बँकेने दिलेल्या अधिकृत माहितीनुसार, येत्या 1 ऑक्टोबरपासून ATM आणि बँक शाखेतून पैसे काढण्याच्या Service Charges यात वाढ करण्याचा निर्णय घेण्यात आला आहे. नवीन नियमांनुसार, ठराविक मर्यादेनंतर होणाऱ्या प्रत्येक व्यवहारासाठी ग्राहकांना आता १० रुपयांऐवजी १५ रुपये अधिक GST इतके शुल्क मोजावे लागणार आहे. ही वाढ प्रामुख्याने बेसिक सेव्हिंग्स बँक डिपॉझिट (BSBD) खातेधारकांसाठी लागू होणार असल्याचे बँकेने स्पष्ट केले आहे.
काय आहेत नवीन नियम आणि शुल्क?
एसबीआयच्या विद्यमान नियमांनुसार, बेसिक सेव्हिंग्स बँक डिपॉझिट (BSBD) खातेधारकांना एका महिन्यात एकूण 4 व्यवहार मोफत मिळतात. या मोफत व्यवहारांमध्ये बँकेच्या शाखेतून रोख रक्कम काढणे, एसबीआयच्या स्वतःच्या एटीएममधून पैसे काढणे किंवा इतर बँकांच्या एटीएमचा वापर करणे या सर्वांचा समावेश होतो.
सध्या या 4 मोफत व्यवहारांची मर्यादा संपल्यानंतर ग्राहकांना पुढील प्रत्येक कॅश विड्रॉव्हलसाठी 10 रुपये अधिक लागू असलेला सेवा कर (GST) द्यावा लागत होता. मात्र, 1 ऑक्टोबरपासून या शुल्कात थेट 5 रुपयांची वाढ करण्यात आली असून, आता ग्राहकांना प्रत्येक अतिरिक्त व्यवहारासाठी 15 रुपये अधिक जीएसटी मोजावा लागेल.
मोफत व्यवहारांच्या मर्यादेत कोणताही बदल नाही
बँकेने स्पष्ट केले आहे की, ग्राहकांना दरमहा मिळणाऱ्या 4 मोफत व्यवहारांच्या मर्यादेत कोणताही बदल करण्यात आलेला नाही. ग्राहक महिनाभरात बँकेच्या शाखेतून किंवा कोणत्याही एटीएममधून 4 वेळा विनाशुल्क पैसे काढू शकतात.
केवळ 5 व्या किंवा त्यापुढील व्यवहारांवरच हे वाढीव शुल्क आकारले जाईल. हा नियम एसबीआय आणि इतर बँकांच्या एटीएमवरून रोख रक्कम काढताना समान पद्धतीने लागू असेल. एटीएम अपयशी ठरल्यास किंवा केवळ शिल्लक तपासणी सारख्या गैर-आर्थिक व्यवहारांवर हे शुल्क लागू होणार नाही, असेही बँकेच्या परिपत्रकात नमूद करण्यात आले आहे.
मिनिमम बॅलन्स ऑब्लिगेशन नाही
सामान्य बचत खात्यात 1,000 ते 3,000 रुपये मिनिमम बॅलन्स ठेवणे बंधनकारक आहे, तर त्यात 0 शिल्लक असले तरीही दंड आकारला जात नाही. सामान्य खाती अमर्यादित किंवा अधिक व्यवहारांना परवानगी देतात, परंतु शून्य शिल्लक खाती महिन्यातून फक्त 4 वेळा विनामूल्य रोख पैसे काढण्याची (एटीएम + शाखा) परवानगी देतात.
चेकबुक शुल्कातही बदल होण्याची शक्यता
एटीएम व्यवहारांसोबतच एसबीआय आपल्या बीएसबीडी खातेधारकांसाठी चेकबुकच्या नियमांमध्येही सुधारणा करत आहे. नवीन नियमांनुसार, एका आर्थिक वर्षात पहिल्या 10 चेक पानांचे चेकबुक मोफत दिले जाईल. त्यानंतर, पुढील 10 पानांच्या चेकबुकसाठी 40 रुपये अधिक जीएसटी आणि 25 पानांच्या चेकबुकसाठी 75 रुपये अधिक जीएसटी शुल्क आकारले जाईल. ज्येष्ठ नागरिकांना मात्र या चेकबुक शुल्कामधून पूर्णपणे सूट देण्यात आली आहे.
ग्राहकांनी काय काळजी घ्यावी?
बँकेने डिजिटल व्यवहारांना चालना देण्यासाठी आणि एटीएमवरील ताण कमी करण्यासाठी हा निर्णय घेतला असल्याचे तज्ज्ञांचे म्हणणे आहे. एसबीआयच्या या निर्णयामुळे सामान्य आणि मध्यमवर्गीय खातेधारकांवर थेट परिणाम होणार आहे. त्यामुळे 1 ऑक्टोबरनंतर अतिरिक्त शुल्क टाळण्यासाठी ग्राहकांनी महिन्यातील आपल्या कॅश विड्रॉव्हलचे योग्य नियोजन करणे आवश्यक आहे.
रोख रकमेचा वापर कमी करून UPI, नेट बँकिंग किंवा मोबाईल बँकिंग यांसारख्या मोफत डिजिटल माध्यमांचा वापर वाढवणे हा या वाढीव शुल्कापासून वाचण्याचा सोपा उपाय आहे.
Leave a Reply