आयपीएल 2026 स्पर्धेत लखनौ सुपर जायंट्सची स्थिती एकदम निराशाजनक राहिली. आतापर्यंत खेळलेल्या 13 पैकी फक्त 4 सामन्यात विजय मिळाला. तर 9 सामन्यात पराभवाचं तोंड पाहावं लागलं आहे. त्यामुळे स्पर्धेतील आव्हान संपुष्टात आलं आहे. असं असताना या लीग स्पर्धेतील शेवटचा सामना लखनौ सुपर जायंट्स पंजाब किंगसविरुद्ध खेळत आहे. या सामन्यात नाणेफेकीचा कौल झाला आणि कर्णधार ऋषभ पंतने अर्जुन तेंडुलकर प्लेइंग इलेव्हनमध्ये आहे याची घोषणा केली. त्यामुळे या स्पर्धेच्या शेवटच्या सामन्यात का होईना अर्जुन तेंडुलकरला खेळण्याची संधी मिळाली. अर्जुन तेंडुलकरने या स्पर्धेत 13 सामने बेंचवर बसून पाहिले. आता स्पर्धेतील आव्हान संपुष्टात आल्यानंतर त्याला प्लेइंग 11 मध्ये संधी दिली आहे. लखनौ सुपर जायंट्ससाठी त्याचा डेब्यू सामना आहे. यापूर्वी आयपीएलमध्ये मुंबई इंडियन्सकडून खेळला होता.
लखनौ सुपर जायंट्सने आपल्या सोशल मिडिया खात्यावर अर्जुन तेंडुलकरची स्तुती करणारे व्हिडीओ टाकले होते. तसेच यॉर्कचा प्रचार करत होते. त्यामुळे त्याला संघात संधी मिळेल असं वाटलं होतं. पण त्याला काही संधी दिली नाही. पण लखनौ सुपर जायंट्सने शेवटच्या सामन्यात त्याला मैदानात उतरवलं आहे. आयपीएल 2026 च्या लिलावापूर्वी मुंबई इंडियन्सने अर्जुन तेंडुलकरला 30 लाख रुपयांना लखनौ सुपर जायंट्सकडे ट्रेड केले होते. आता या सामन्यात अर्जुन तेंडुलकरच्या कामगिरीकडे लक्ष लागून आहे. अर्जुन वेगवान गोलंदाज असून अष्टपैलू खेळाडू आहे. खालच्या फळीत फलंदाजाची भूमिका बजावेल अशी अपेक्षा आहे. त्याने संघात मयंक यादवची जागा घेतली आहे.
अर्जुन तेंडुलकर गोलंदाजी आणि फलंदाजीत कशी कामगिरी करतो याकडे त्याच्या चाहत्यांचं लक्ष लागून आहे. आतापर्यंत त्याला स्पर्धेत एकही संधी मिळाली नव्हती. पण जाता जाता या स्पर्धेत आपली छाप सोडून जाईल अशी अपेक्षा आहे. जेणेकरून पुढच्या पर्वात त्याला लखनौकडून प्लेइंग 11 मध्ये खेळण्याची संधी मिळेल. कारण या पर्वातील कामगिरीनंतर लखनौ सुपर जायंट्स संघ कात टाकणार हे निश्चित आहे. त्यामुळे कोण संघात राहतं आणि जातं हे पाहणंही औत्सुक्याचं ठरेल.
लखनौ सुपर जायंट्स (प्लेइंग इलेव्हन): जोश इंग्लिस, अर्शीन कुलकर्णी, निकोलस पूरन, आयुष बडोनी, ऋषभ पंत (विकेटकीपर/कर्णधार), अब्दुल समद, मुकुल चौधरी, अर्जुन तेंडुलकर, मोहम्मद शमी, प्रिन्स यादव, मोहसीन खान.
Leave a Reply