नागराज मंजुळे दिग्दर्शित ‘मटका किंग’ ही वेब सीरिज सध्या सोशल मीडियावर चांगलीच चर्चेत आहे. यामध्ये अभिनेता विजय वर्माने मुख्य भूमिका साकारली आहे. नागराज मंजुळेंनी या सीरिजसाठी काही मराठी कलाकारांचीही निवड केली आहे. त्यात विजय वर्माची ऑनस्क्रीन पत्नीची भूमिका साकारून अभिनेत्री सई ताम्हणकर भाव खाऊन जातेय. तर दुसरीकडे सिद्धार्थ जाधवने साकारलेली दगडू विचारेचीही भूमिका प्रेक्षकांच्या पसंतीस उतरली आहे. परंतु या सीरिजमधील एक मोठी चूक एका नेटकऱ्याने अचूक हेरली आहे. यासंदर्भातील व्हिडीओ पोस्ट करत या युजरने ही चूक सर्वांच्या लक्षात आणून दिली आहे.
‘मटका किंग’ या सीरिजच्या सुरुवातील जेव्हा विजय वर्मा कामगारांना मालाची ने-आण करण्याबाबत विचारतो, तेव्हा कोणीही उत्तर देत नाही. अशा वेळी हातगाडीवर झोपलेला दगडू (सिद्धार्थ) उठतो आणि ते काम करण्यास तयार होतो. या सीनमध्ये सिद्धार्थच्या पायाकडे कॅमेराचा फोकस पहायला मिळतो. तो एका पायानं अधू असतो, त्यामुळे तो लंगडत चालतो. नंतर एका सीनमध्ये मात्र हाच दगडू अजिबात न लंगडता एकदम व्यवस्थित चालताना दिसतो. हीच चूक या नेटकऱ्याने हेरली आणि त्याचा व्हिडीओ पोस्ट केला आहे. ही चूक नागराज मंजुळेंकडून कशी झाली, असा सवाल त्याने केला आहे.
View this post on Instagram
या व्हिडीओवर नेटकऱ्यांनी विविध प्रतिक्रिया दिल्या आहेत. ‘चांगलं निरीक्षण आहे’ असं एकाने म्हटलं. तर ‘आयुष्यात तुझ्याकडे किती वेळ आहे’, असं दुसऱ्याने लिहिलं आहे. जरी या सीनमध्ये चूक झाली असली तरी सिद्धार्थच्या दमदार अभिनयाचं मात्र सर्वजण कौतुक करत आहेत. सिद्धार्थ जाधवची ही पहिली वेब सीरिज आहे. ही संधी दिल्याबद्दल त्याने नागराज मंजुळेंसाठी खास पोस्ट लिहिली होती.
‘माझ्या आयुष्यातली पहिली वेब सीरिज, ती ही तुझ्या दिग्दर्शनाखाली.. दगडू विचारे नावाचं पात्र तू मला साकारायला दिलंस, माझ्यावर विश्वास टाकलास. ॲमेझॉन प्राइमसारखा प्लॅटफॉर्म, सिद्धार्थ रॉय कपूर, अश्विनी मॅम यांच्यासारखे निर्माते, आणि विजय वर्मा, सई ताम्हणकर, क्रितिका कामरा, गुलशन ग्रोवर सर, भरत जाधव सर, भूपेंद्र जडावत, गिरीश कुलकर्णी सर, किशोर कदम सर अशा मात्तबर कलाकारांबरोबर काम करायची संधी मिळाली. नटाला प्रत्येक वेळेला चांगलं काम करायची संधी हवी असते आणि कुणीतरी तो विश्वास टाकावा अशी त्याची इच्छा असते. म्हणून तूच लिहिलेला डायलॉग तुलाच सारखा सारखा ऐकवतो.. “शुक्रिया सेठ.. काम देने के लिए नही.. भरोसा रखने के लिये,” अशा शब्दांत त्याने भावना व्यक्त केल्या होत्या.
Leave a Reply