गेल्या काही दिवसांपासून राज्यातील पावसाचा जोर थोडा कमी झाला आहे. मराठवाडा आणि विदर्भाकडे पावसाने पाठ फिरवली आहे. 20 ऑगस्टसाठी हवामान विभागाने राज्याला काही खास इशारा दिला नसला तरी काही भागात पावसाची शक्यता आहे. तर दुसरीकडे देशाच्या काही भागात अतिवृष्टीचा इशारा देण्यात आला आहे. उद्यासाठी राज्याच्या आणि देशाच्या कोणत्या भागात पावसाच्या सरी कोसळणार याबाबत सविस्तर माहिती जाणून घेऊयात.
कोकण आणि उत्तर महाराष्ट्रातील हवामान
हवामान विभागाने 20 ऑगस्ट रोजी राज्याच्या अनेक भागांत पावसाची शक्यता वर्तवली आहे. कोकणातील काही जिल्ह्यांमध्ये हलका ते मध्यम पाऊस पडण्याची शक्यता आहे. पालघर आणि मुंबईत हलका पाऊस, तर ठाणे, रायगड आणि रत्नागिरीत हलका ते मध्यम पाऊस पडण्याची शक्यता आहे. सिंधुदुर्ग मध्येही मध्यम स्वरूपाच्या पावसाची शक्यता आहे. उत्तर महाराष्ट्रातील धुळे, नंदुरबार, जळगाव, नाशिक या जिल्ह्यांत हलक्या पावसाची शक्यता वर्तविण्यात आली आहे. तर अहिल्यानगरमध्ये वादळी वाऱ्यासह पावसाची शक्यता आहे.
पश्चिम महाराष्ट्र आणि मराठवाड्यातील हवामान
पश्चिम महाराष्ट्रातील पुणे, कोल्हापूर आणि सातारा घाटमाथा परिसरात मध्यम स्वरूपाचा पाऊस पडू शकतो. तर कोल्हापूर, सातारा, सांगली आणि सोलापूर या जिल्ह्यांमध्ये तुरळक ठिकाणी हलक्या पावसाची शक्यता आहे. मराठवाड्यातील छत्रपती संभाजीनगर, जालना, हिंगोली, लातूर आणि धाराशिव जिल्ह्यांत हलक्या ते मध्यम स्वरूपाच्या पावसाची शक्यता आहे. तर परभणी, बीड आणि नांदेड जिल्ह्यांत वादळी वाऱ्यासह पाऊस पडू शकतो असं हवामान विभागाने म्हटलं आहे. विदर्भातील जिल्ह्यांमध्ये पावसाचा इशारा देण्यात आलेला नाही, मात्र काही भागात ढगाळ वातावरणाची शक्यता आहे.
उत्तर प्रदेशात अतिवृष्टीचा इशारा
भारतीय हवामान विभागाने उत्तर भारतापासून पूर्व आणि ईशान्य भारतातील अनेक भागात उद्या म्हणजेच 20 ऑगस्टला मुसळधार पावसाची शक्यता वर्तवली आहे. पश्चिम उत्तर प्रदेशात 20 आणि 22 ऑगस्टला मुसळधार ते अतिमुसळधार पावसाची शक्यता आहे. तर पूर्व उत्तर प्रदेशात 21 ते 24 ऑगस्टदरम्यान जोरदार पाऊस होऊ शकतो. तर राजधानी दिल्ली आणि आसपासच्या भागात उद्या आकाश साधारणपणे ढगाळ राहण्याची शक्यता आहे. तसेच पूर्व आणि ईशान्य भारतातील अनेक भागात उद्या मुसळधार पावसाची शक्यता आहे.
Leave a Reply