1976 मध्ये आलेल्या ‘नागिन’ या चित्रपटाने हिंदी चित्रपटसृष्टीत बदलेची कथा एका वेगळ्या पद्धतीने मांडली. पतीच्या मृत्यूचा बदला घेणाऱ्या एका महिलेची ही कहाणी प्रेक्षकांना खिळवून ठेवणारी ठरली. रीना रॉय यांनी साकारलेली नागिन आजही या चित्रपटाची खास ओळख मानली जाते.
फ्रेंच कादंबरीवर आधारित कथा
‘नागिन’ची कथा 1963 मध्ये प्रकाशित झालेल्या ‘The Bride Wore Black’ या फ्रेंच कादंबरीपासून प्रेरित होती. कादंबरीतील महिलेप्रमाणेच चित्रपटातही पतीच्या मृत्यूचा बदला घेण्यासाठी पाच जणांना लक्ष्य केले जाते. मात्र ही कथा भारतीय प्रेक्षकांसाठी नाग-नागिनच्या रूपात मांडण्यात आली.
मोठ्या कलाकारांची वेगळी भूमिका
19 जानेवारी 1976 रोजी प्रदर्शित झालेल्या या चित्रपटाचे दिग्दर्शन आणि निर्मिती राजकुमार कोहली यांनी केली होती. सुनील दत्त, जीतेंद्र, फिरोज खान, संजय खान, कबीर बेदी, अनिल धवन, योगिता बाली, रेखा, मुमताज आणि रीना रॉय यांसारखे कलाकार चित्रपटात होते. विशेष म्हणजे अनेक मोठे कलाकार या कथेत नायक म्हणून नव्हे, तर विरोधी भूमिकांमध्ये दिसले.
6 गाण्यांनीही मिळवली लोकप्रियता
लक्ष्मीकांत-प्यारेलाल यांच्या संगीताने चित्रपटाची रंगत वाढवली. ‘तेरे संग प्यार में नहीं तोड़ना’ आणि ‘तेरे इश्क का मुझपे हुआ ये असर है’ ही गाणी विशेष लोकप्रिय झाली. ‘तेरे संग प्यार में नहीं तोड़ना’चे 3 वेगवेगळे प्रकार चित्रपटात होते.
रीना रॉय यांना मिळाली खास ओळख
रीना रॉय यांनी नागिनची भूमिका प्रभावीपणे साकारली. ‘द कपिल शर्मा शो’मध्ये त्यांनी सांगितले होते की, रेखा आणि आशा पारेख यांच्यासह अनेक अभिनेत्रींच्या नकारानंतर त्यांना ही भूमिका मिळाली. त्यांच्या आईलाही सुरुवातीला ही भूमिका आवडली नव्हती. मात्र रीना रॉय यांना कथा आवडल्याने त्यांनी चित्रपट स्वीकारला. चित्रपटाच्या यशामुळे त्यांची लोकप्रियता आणखी वाढली आणि पुढे नाग-नागिनच्या कथा चित्रपट तसेच टीव्हीवर मोठ्या प्रमाणात पाहायला मिळू लागल्या.
Leave a Reply