टीव्हीच्या दुनियेत अनेक असे रहस्य आणि धक्कादायक घटना दडलेल्या आहेत, ज्यांची आठवण आजही अंगावर काटा आणते. 90 च्या दशकात घडलेली अशीच एक भीषण दुर्घटना संपूर्ण मनोरंजन विश्वाला हादरवून गेली होती.
एका लोकप्रिय ऐतिहासिक मालिकेच्या शूटिंगदरम्यान अचानक लागलेल्या आगीने काही क्षणांत सर्व काही उद्ध्वस्त केलं. या दुर्घटनेत अनेक कलाकार आणि क्रू सदस्यांचा दुर्दैवी मृत्यू झाला होता. ही घटना होती प्रसिद्ध ऐतिहासिक मालिका 'द स्वॉर्ड ऑफ टिपू सुलतान'च्या सेटवरील.
‘द स्वॉर्ड ऑफ टीपू सुलतान’ ही मालिका त्या काळातील सर्वात चर्चित ऐतिहासिक मालिकांपैकी एक होती. या मालिकेत संजय खान यांनी मुख्य भूमिका साकारली होती. ही मालिका 25 फेब्रुवारी 1990 ते 14 एप्रिल 1991 दरम्यान दूरदर्शनवर प्रसारित झाली होती आणि प्रेक्षकांनी तिला भरभरून प्रतिसाद दिला होता. मात्र, या मालिकेची ओळख फक्त कथेमुळे नाही तर सेटवर घडलेल्या भीषण दुर्घटनेमुळेही कायम स्मरणात राहिली.
8 फेब्रुवारी 1989 हा दिवस या मालिकेशी संबंधित सर्वांसाठी अत्यंत दुर्दैवी ठरला. त्या दिवशी मैसूरमधील प्रीमियर स्टुडिओमध्ये मालिकेचं शूटिंग सुरू होतं. शूटिंगदरम्यान अचानक सेटवर आग लागली आणि काही मिनिटांतच आगीने संपूर्ण सेटला वेढा घातला.
या भीषण दुर्घटनेत जवळपास 60 जणांचा मृत्यू झाला होता. मृतांमध्ये कलाकारांसह अनेक क्रू मेंबर्सचाही समावेश होता. ही घटना आजही भारतीय टीव्ही इंडस्ट्रीतील सर्वात मोठ्या दुर्घटनांपैकी एक मानली जाते. आगीत संजय खान हे देखील गंभीररीत्या भाजले होते. या दुर्घटनेनंतर संजय खान यांच्यावर तब्बल 13 महिने रुग्णालयात राहावं लागलं होतं.
Leave a Reply