अभिनेता शाहरुख खान आणि मलायका अरोरा यांच्यावर चित्रित झालेलं 'छैया छैया' हे गाणं आजही बॉलिवूडमधील सर्वांत आयकॉनिक गाणं मानलं जातं. हे गाणं कुठेही लागलं तरी लोकांचे पाय आपोआप थिरकू लागतात. इतक्या वर्षांनंतरही 'छैया छैया' गाणं प्रचंड लोकप्रिय आहे. मात्र फार कमी लोकांना हे माहीत असेल की, या गाण्यासाठी मलायका अरोरा ही पहिली निवड नव्हती.
'इंडियाज बेस्ट डान्सर 5'मध्ये अभिनेत्री शिल्पा शिरोडकरने याचा खुलासा केला आहे. जाड असल्यामुळे कोरिओग्राफर फराह खानने शिल्पाला नाकारलं होतं. शोचा सूत्रसंचालक हर्ष लिंबाचियाने शिल्पाला याविषयी विचारलं असता तिने तेव्हाचा किस्सा सांगितला.
खरंतर फराह खान माझ्याकडे त्या गाण्याची ऑफर घेऊन आली होती. ती म्हणाली, हे गाणं आहे आणि मी तुला पंधरा दिवस देते. तुझं वजन कमी कर. त्यामुळे मी पुढचे पंधरा दिवस फक्त उकडलेल्या भाज्या खात होती. माझं वजन तर कमी झालं, मात्र त्यावर फराह खान समाधानी नव्हती”, असं शिल्पाने सांगितलं.
याविषयी ती पुढे म्हणाली, “फराह खान मला म्हणाली की, माफ कर, पण तू अजूनही जाडच आहेस. आम्ही तुला या गाण्यात घेऊ शकत नाही. नंतर मलायका अरोराने ते गाणं केलं. मी खोटं सांगत नाही, मी जाड होती. त्यामुळे मला ते गाणं मिळालं नाही. फराह सांगते की माझं वजन 100 किलो होतं. पण तेवढं काही नव्हतं.”
शिल्पा शिरोडकरने अनेक चित्रपट आणि टेलिव्हिजन प्रोजेक्ट्समध्ये काम केलंय. नव्वदच्या दशकात ती लोकप्रिय अभिनेत्री होती. बिग बॉसच्या अठराव्या सिझनमध्येही तिने स्पर्धक म्हणून भाग घेतला होता. शिल्पा ही अभिनेत्री नम्रता शिरोडकरची बहीण आहे.
Leave a Reply