नवी दिल्ली, 04 जून : भारताच्या राजकीय इतिहासात सुवर्णाक्षरांनी लिहिला जाईल असा एक महत्त्वाचा टप्पा 10 जून रोजी गाठला जाणार आहे. पंतप्रधान नरेंद्र मोदी हे भारतात सर्वाधिक काळ सत्तेत राहिलेले पंतप्रधान म्हणून अभूतपूर्व विक्रम आपल्या नावावर करणार आहेत. 1951-52 च्या पहिल्या सार्वत्रिक निवडणुकीपूर्वीचा अंतरिम कालावधी वगळता, केवळ निवडून आलेल्या सरकारच्या दिवसांची गणना केली असता पंतप्रधान मोदी हे काँग्रेसचे दिग्गज आणि देशाचे पहिले पंतप्रधान पंडित जवाहरलाल नेहरू यांचा दीर्घकालीन विक्रम मोडणार आहेत.
विक्रमाचा आकडा
26 मे 2014 रोजी प्रथमच देशाचे पंतप्रधान म्हणून शपथ घेतलेल्या नरेंद्र मोदी यांनी 10 जून 2026 पर्यंत सलग 4,399 दिवस सत्तेत राहण्याचा टप्पा गाठलेला असेल. जवाहरलाल नेहरू यांनी देशाच्या पहिल्या सार्वत्रिक निवडणुकीनंतर, म्हणजे 13 मे 1952 पासून ते 27 मे 1964 रोजी निधन होईपर्यंत, निवडून आलेले पंतप्रधान म्हणून एकूण 4,398 दिवस सेवा बजावली होती.
इंदिरा गांधींचा कार्यकाळ
याच यादीत नेहरूंच्या कन्या इंदिरा गांधी यांनी 1966 ते 1977 या कालावधीत सलग 4,077 दिवस सत्तेत राहून तिसरे स्थान मिळवले आहे. जवाहरलाल नेहरू आणि नरेंद्र मोदी या दोन्ही नेत्यांनी आपल्या वेगळ्या शैलीत भारतीय राजकारणाची दिशा बदलली. नेहरू यांनी स्वातंत्र्योत्तर भारतात ‘धर्मनिरपेक्ष सहमती’च्या आधारावर अनेक दशके देशाचे नेतृत्व केले, तर पंतप्रधान मोदी यांनी सांस्कृतिक राष्ट्रवाद आणि वेगवान विकासाच्या मिश्रणातून भारताच्या राजकारणाचे नवे व्याकरण लिहिले. आजच्या तीव्र राजकीय स्पर्धेच्या वातावरणात सलग तीन वेळा मोठ्या जनादेशासह विजय मिळवणे, हे मोदी यांच्या नेतृत्वशक्तीचे प्रतीक मानले जात आहे.
ऐतिहासिक सुधारणा आणि ठाम निर्णयांचा काळ
पंतप्रधान नरेंद्र मोदी यांच्या या दीर्घ कार्यकाळात भारताच्या सार्वभौमत्व आणि प्रशासकीय सुधारणांना नवी दिशा मिळाली. स्वातंत्र्यानंतर अनेक दशकांपासून प्रलंबित असलेले अनेक ऐतिहासिक निर्णय त्यांच्या कार्यकाळात प्रत्यक्षात आले.
कलम 370 रद्द
जम्मू-काश्मीरला देण्यात आलेला विशेष दर्जा रद्द करून त्याला पूर्णपणे भारताच्या मुख्य प्रवाहात आणणे, हे राष्ट्रीय सुरक्षा आणि एकात्मतेच्या दृष्टीने मोठे यश मानले जाते.
सामाजिक सुधारणा (तिहेरी तलाक बंदी)
मुस्लिम महिलांच्या हक्कांच्या संरक्षणासाठी ‘तिहेरी तलाक’ प्रथेवर बंदी घालून सामाजिक न्यायाला बळ देण्यात आले.
भव्य राम मंदिर निर्माण
शतकानुशतके सुरू असलेल्या वादाला सर्वोच्च न्यायालयाच्या माध्यमातून तोडगा काढून अयोध्येत भव्य राम मंदिर उभारण्यात आले, जे नवभारताच्या सांस्कृतिक अभिमानाचे प्रतीक मानले जाते.
सलग तीनवेळा नेतृत्व
काँग्रेसच्या दीर्घकालीन राजकीय चौकटीतून बाहेर पडत, गुजरातचे मुख्यमंत्री म्हणून तीन वेळा विजय मिळवल्यानंतर राष्ट्रीय राजकारणातही सलग तिसऱ्यांदा एनडीए सरकारचे नेतृत्व करणारे पंतप्रधान मोदी यांची ही कामगिरी जगभरात भारतीय लोकशाहीच्या स्थैर्याचे उदाहरण म्हणून पाहिली जात आहे.
Leave a Reply