मराठा आरक्षण आंदोलक मनोज जरांगे पाटील यांनी पुन्हा एकदा 29 ऑगस्टपासून मराठा आरक्षणासाठी आंदोलनाचा इशारा दिला आहे, यावरून वातावरण तापलेलं असतानाच काँग्रेसचे ओबीसी नेते विजय वडेट्टीवार यांनी राष्ट्रवादी शरद पवार गटाच्या नेत्या आणि खासदार सुप्रिया सुळे यांच्याबद्दल मोठा दावा केला. सुप्रिया सुळे यांच्याकडे ओबीसी प्रमाणपत्र असल्याचं त्यांनी म्हटलं. तसेच शरद पवार यांच्याकडे ओबीसी प्रमाणपत्र आहे की नाही? हे मला माहिती नाही, त्यावर मी बोलू शकत नाही. मात्र महाराष्ट्रातील अनेक बड्या नेत्यांकडे ओबीसीचं प्रमाणपत्र आहे, असंही त्यांनी म्हटलं होतं. यावरून आता वातावरण चांगलंच तापलं आहे. काँग्रेस आणि राष्ट्रवादी शरद पवार गट आमने-सामने आले आहेत. राष्ट्रवादी शरद पवार गटाचे प्रदेशाध्यक्ष शशिकांत शिंदे यांनी विजय विजय वडेट्टीवार यांच्यावर जोरदार हल्लाबोल केला आहे.
नेमकं काय म्हणाले शशिकांत शिंदे?
शशिकांत शिंदे यांनी विजय वडेट्टीवार यांच्यावर जोरदार हल्लाबोल केला आहे. मित्र पक्षांना संपवण्यापेक्षा त्यांच्यासोबत काम करणं गरजेचं आहे. 2014 ला काँग्रेसमुळे सत्ता गेली. आम्ही महायुतीमध्ये जाण्याची चर्चा आहे, मात्र आम्ही महायुतीमध्ये गेलो का? आम्ही आहे तिथेच आहोत, मग आम्हाला टार्गेट का केलं जात आहे. विजय वडेट्टीवार यांना कुठून पुरावे मिळाले? ते त्यांनी सांगावं, अशी मागणी शशिकांत शिंदे यांनी यावेळी केली आहे. तसेच वडेट्टीवार यांनी कोणाची सुपारी घेतली हे त्यांनी सांगावं, मित्राची गरज काँग्रेसला वाटत नाही का? सुप्रिया सुळे यांच्याबद्दल चुकीचे आरोप सहन करणार नाही, असा इशाराही यावेळी शिंदे यांनी दिला आहे.
Leave a Reply