भोंदूबाबा मनोहर भोसले याला अटक करण्यात आल्यानंतर त्याचे एक एक कारनामे आता समोर आले आहे. स्वत:कडे दैवी शक्ती असल्याचं भासवणाऱ्या या भोंदूबाबाने अनेकांना लूटल्याचं समोर आलं आहे. केवळ सोलापूरपर्यंतच त्याचा पसारा मर्यादित नसून त्याचं मुंबईशी कनेक्शन निघाल्याचंही समोर आलं आहे. सुके बोंबिल विकायचा, एक दिवस गायब झाला अन् बाळू मामाचा अवतार म्हणून तो अवतरला. त्यानंतर त्याचा भोंदूगिरीचा खेळ सुरू झाला. या खेळात त्याने अनेकांना फसवलं आणि आपलं मोठं साम्राज्य उभारलं. नेमकं काय केलं भोंदू भोसलेने?
मूळचा इंदापूर तालुक्यातील (लासुर्णे) येथील मनोहर भोसले डीएडमध्ये नापास झाल्यावर सुके बोंबिल विकून घर चालवत होता. पण त्यातून फारशी मिळकत होत नसल्याने तो अचानक गायब झाला. काही काळ बेपत्ता राहिल्यानंतर तो गावात परतला आणि त्याने ‘मनोहर मामा’ हे नाव धारण करून भोंदूगिरी सुरू केली. त्याने स्वत:ला बाळू मामाचा अवतार म्हणून घोषित केले. भोंदूगिरीच्या पैशातून त्याने उंदरगाव, घोटी येथे थेट 27 एकरात आश्रम थाटला. हा अत्यंत अलिशान असा मठ आहे. या मठातून भोंदूगिरी करत तो कोट्यधीश बनला. पोलिस आता या संपत्तीच्या अँगलनेही तपास करत आहेत.
अमिष दाखवले…
व्यवसायात भरभराटीचे आमिष दाखवून 50 हजारांचा गंडा घातल्याप्रकरणी सोलापूर ग्रामीण पोलिसांनी त्याला पुण्यातून (मांजरी) अटक केली. त्यानंतर त्याला न्यायालयात हजर केले असता माढा न्यायालयाने त्याला 3 दिवसांची पोलिस कोठडी सुनावली आहे.
आश्रम बंद करण्याची मागणी
भोंदूबाबा मनोहर भोसलेवर बारामती, करमाळा, कुर्डुवाडी पोलिसात विविध गुन्हे दाखल झाले आहेत. तसेच लोणंद ( सातारा ) आणि दौंड ( पुणे ) पोलिसांतही मनोहर भोसले विरोधात अनेक तक्रारी दाखल आहेत. सध्या मनोहर भोसले हा करमाळयाच्या जेलमध्ये आहे. घोटी गावचे सरपंच विलास राऊत यांनी घोटी येथील मनोहर भोसलेचा आश्रम बंद करण्याची मागणी पोलीस अधीक्षकांकडे पत्राद्वारे केली आहे.
भोंदू मनोहरवर दाखल गुन्हे
2021 (बारामती) : कॅन्सर बरा करण्याच्या नावाखाली 2 लाख 51 हजारांची फसवणूक (जादुटोणा विरोधी कायद्यानुसार गुन्हा).
2021 (करमाळा) : टीव्ही मालिकेत काम देण्याच्या आमिषाने महिलेवर अत्याचार आणि आर्थिक लूट.
2026 (कुर्डुवाडी) : व्यवसायात भरभराटीसाठी 50 हजारांचा गंडा (सध्या याच गुन्ह्यात अटक). याशिवाय सातारा (लोणंद) आणि पुणे (दौंड) पोलिसांतही त्याच्याविरोधात अनेक तक्रारी दाखल आहेत.
Leave a Reply