राष्ट्रवादी काँग्रेस (शरद पवार) पक्षाच्या खासदार सुप्रिया सुळे यांची कन्या रेवती सुळे शनिवारी 20 जून रोजी लग्नबंधनात अडकली. नागपूरचे उद्योजक सारंग लखानी आणि रेवती सुळे यांचा विवाहसोहळा मुंबईत पार पडला. या लग्नसोहळ्याला राजकीय, सामाजिक, कला आणि क्रिकेट क्षेत्रातील अनेकजण उपस्थित होते. अशातच समाजवादी पार्टीच्या खासदार आणि क्रिकेटर रिंहू सिंहची होणारी पत्नी प्रिया सरोज यांनी सर्वांचं लक्ष वेधलं.
प्रिया सरोज यांनी रेवती सुळेच्या लग्नाचे काही खास फोटो सोशल मीडियावर पोस्ट केले आहेत. प्रिया सरोज नेहमीच त्यांच्या साध्या आणि सहज अंदाजामुळे चर्चेत असतात. आता रेवतीच्या लग्नातही त्यांचा साधा पण तितकाच आकर्षक लूक चर्चेत राहिला. यावेळी त्यांना मेहंदी रंगाची रेशमी साडी नेसली होती.
लहान मोत्यांचं सुंदर भरतकाम केलेली काठ आणि हलकीशी चमक.. अशी ही प्रिया सरोज यांची खास साडी होती. या साडीमुळे त्यांचा लूक अधिकच खास दिसत होता. हा लूक अधिक खुलवण्यासाठी त्यांनी त्यावर कॉन्ट्रास्ट रंगाचा ब्लाऊज परिधान केला होता.
या लग्न समारंभातील एका खास क्षणाने सर्वांचं लक्ष वेधून घेतलं होतं. प्रिया सरोज जेव्हा वधू-वराला भेटण्यासाठी मंचाजवळ उभ्या होत्या, तेव्हा सुप्रिया सुळे तिथे आल्या आणि त्यांनी प्रिया यांचा हात धरत त्यांना पुढे मंचाजवळ नेलं. या क्षणाचा व्हिडीओ सोशल मीडियावर तुफान व्हायरल झाला होता.
प्रिया सरोज लवकरच क्रिकेटर रिंकू सिंहशी लग्न करणार आहेत. 8 जून रोजी लखनौ इथं या दोघांचा साखरपुडा पार पडला होता. 2024 च्या लोकसभा निवडणुकीत देशाच्या विविध भागांमधून निवडून आलेल्या सर्वांत तरुण महिला खासदारांपैकी एक प्रिया सरोज होत्या. त्यावेळी त्यांचं वय फक्त 25 वर्षे होतं.
Leave a Reply