विरोधी पक्षनेते राहुल गांधी यांच्या पुणे दौऱ्याला बदनाम करण्यासाठी सत्ताधाऱ्यांकडून जाणीवपूर्वक कट रचला जात असल्याचा दावा खासदार प्रणिती शिंदे यांनी केला आहे. वसतिगृहातील विद्यार्थ्यांच्या मुद्द्याला राजकीय वळण देऊन भाजप केवळ नकारात्मक राजकारण करत असून, हा वाद म्हणजे पूर्वनियोजित कटकारस्थान असल्याचा घणाघात शिंदे यांनी माध्यमांशी बोलताना केला.
विरोधी पक्षनेते राहुल गांधी यांच्या पुणे दौऱ्यादरम्यान शासकीय अभियांत्रिकी महाविद्यालय (COEP) वसतिगृहात काल मध्यरात्री काँग्रेस-NSUI आणि ABVP कार्यकर्त्यांमध्ये झालेल्या वादामुळे पुण्यातील राजकीय वातावरण चांगलेच तापले आहे.
या घटनेवर आता काँग्रेसच्या आक्रमक नेत्या आणि खासदार प्रणिती शिंदे यांनी आपली अत्यंत तीव्र प्रतिक्रिया नोंदवली आहे. “नकारात्मक प्रचार करण्यात भाजप माहीर आहे,” असा थेट आरोप करत त्यांनी पुण्यातील संपूर्ण घटनाक्रम हे राहुल गांधी यांच्या विरोधात रचलेले भाजपचे कटकारस्थान असल्याचे म्हटले आहे.
‘निगेटिव्ह प्रचार करण्यात भाजप माहीर’
माध्यमांशी संवाद साधताना खासदार प्रणिती शिंदे यांनी सत्ताधारी भारतीय जनता पक्षाच्या कार्यपद्धतीवर जोरदार हल्लाबोल केला. त्या म्हणाल्या की, जेव्हा जेव्हा विरोधकांचे मोठे कार्यक्रम किंवा दौरे आयोजित केले जातात, तेव्हा त्यांचा मूळ उद्देश भरकटवण्यासाठी आणि लोकांचे लक्ष विचलित करण्यासाठी जाणीवपूर्वक नकारात्मक वातावरण तयार केले जाते. नकारात्मक प्रचार करण्यात भारतीय जनता पक्ष नेहमीच आघाडीवर राहिला असून, राहुल गांधी यांच्या प्रतिमेला धक्का लावणे हाच यामागील मुख्य हेतू असल्याचा दावा त्यांनी केला.
राहुल गांधींचा निगेटिव्ह प्रचार करण्याचा सत्ताधाऱ्यांचा डाव
प्रणिती शिंदे यांनी आपल्या प्रतिक्रियेत पुढे नमूद केले की, विरोधी पक्षनेते राहुल गांधी हे देशातील तरुण आणि विद्यार्थ्यांशी थेट संवाद साधून त्यांच्या शैक्षणिक व इतर समस्या जाणून घेण्यासाठी पुण्यात आले आहेत. या दौऱ्याला मिळणारा विद्यार्थ्यांचा प्रतिसाद पाहून सत्ताधाऱ्यांमध्ये अस्वस्थता निर्माण झाली आहे. त्यामुळेच विद्यार्थ्यांच्या एका संवेदनशील आणि स्थानिक समस्येचे राजकीय भांडवल करून राहुल गांधींचा निगेटिव्ह प्रचार करण्यासाठी हा संपूर्ण राडा घडवून आणण्यात आला, असा आरोप काँग्रेस खासदारांनी केला आहे.
पुण्यातील घटना म्हणजे भाजपचे कटकारस्थान
वसतिगृहातील अनाथ ओबीसी विद्यार्थिनीच्या मुलाखतीवरून आणि त्यानंतर झालेल्या माफीनाम्यावरून सुरू असलेल्या वादावर बोलताना प्रणिती शिंदे यांनी हा प्रकार म्हणजे भाजपचे पूर्वनियोजित कटकारस्थान असल्याचे म्हटले आहे. त्यांच्या मते, सामान्य विद्यार्थिनींच्या माध्यमातून समोर येणाऱ्या समस्यांना चुकीचे वळण देऊन, संस्थात्मक दबावाचा वापर करत या प्रकरणाचा राजकीय फायदा उठवण्याचा प्रयत्न केला गेला आहे.
कायद्याच्या चौकटीत तपास करण्याची मागणी
या संपूर्ण प्रकरणाला आता दोन्ही बाजूंनी राजकीय रंग आला असून, पुणे पोलिसांनी मध्यरात्री झालेल्या राड्यानंतर दोन्ही विद्यार्थी संघटनांच्या तक्रारी आणि उपलब्ध व्हिडिओ फुटेजच्या आधारे तपास सुरू केला आहे. पोलिसांनी 50 ते 60 कार्यकर्त्यांवर गुन्हे दाखल केले असून कॅम्पसमध्ये सुरक्षा वाढवली आहे.
दरम्यान, काँग्रेस पक्षाने या प्रकरणात पारदर्शक चौकशी व्हावी आणि कोणत्याही विद्यार्थ्यावर राजकीय दबावापोटी अन्याय होऊ नये, अशी मागणी केली आहे.
Leave a Reply