नाशिकमधील खड्ड्यांच्या मुद्द्यावरून मनसे अध्यक्ष राज ठाकरे यांनी राज्य सरकारवर जोरदार टीका केली आहे. गुजरातच्या कंत्राटदारांना कामं दिली आहेत. त्यामुळे नाशिकमध्ये खड्डे पडल्याचं त्यांनी म्हटलं होतं. आमची सत्ता असताना नाशिक सुंदर होतं. पण आम्ही केलेल्या कामांकडेही दुर्लक्ष केलं जात आहे, असंही राज ठाकरे यांनी म्हटलं होतं. गिरीश महाजन यांनी राज ठाकरे यांच्या या आरोपावर प्रत्युत्तर दिलं आहे. तुम्ही नाशिक एवढं सुंदर केलं होतं तर मग तुमचा एक तरी नगरसेवक का निवडून आला नाही? सर्वच्या सर्व कसे पडले? असा सवाल करतनाच नाशिकच्या कंत्राटदारांची यादी पाठवतो. एक तरी बाहेरचा कंत्राटदार दाखवा, अंस आव्हानच गिरीश महाजन यांनी राज ठाकरे यांना दिलं आहे.
राज्याचे मंत्री गिरीश महाजन यांनी मीडियाशी संवाद साधताना ही प्रतिक्रिया दिली. नाशिककरांनी आपलं सरकार पाहिलं. तुमचे महापौर पाहिलं. तुमचा कार्यकाळ संपल्यावर एकही नगरसेवक निवडून दिला नाही. एवढं सुंदर नाशिक केलं होतं तर लोकांनी असा रिजल्ट का दिला? माझा त्यांना सवाल आहे. त्याचं उत्तर द्या. नाशिकमध्ये काहीही केलं नाही. नुसत्या गप्पा केल्या. सुंदर हरीत काहीही केलं नाही. नाशिक सुंदर केलं तर मग तुमचे दोन चार नगरसेवक निवडून आले असते. कुणालाच निवडून दिलं नाही. यावरून तुम्ही काय केलं हे दिसतं. लोकांना सर्वांना माहीत आहे, असा टोला गिरीश महाजन यांनी लगावला.
30 वर्ष खड्डा पडणार नाही
नाशिक शहरातील मुख्य रस्ते सिमेंट काँक्रिटचे करणार आहोत. पुढचे 30 ते 40 वर्ष खड्डा पडणार नाही याची काळजी घेऊ. रस्त्यांची कामे सुरू आहेत. रस्त्यांची कामे मोठ्या प्रमाणावर होणार असल्याने त्रास होणार आहे हे आधीच सांगितलं होतं. त्याबद्दल दिलगिरी व्यक्त केली होती. गेल्या आठवड्यात मी तीन दिवस नाशिकमध्ये होतो. आढावा घेत होतो, असं गिरीश महाजन म्हणाले.
यादीच देतो…
गुजराती कंत्राटदारांना नाशिकची कामे दिल्याचा आरोप राज ठाकरे यांनी केला होता. त्यावरही त्यांनी प्रतिक्रिया दिली. राज ठाकरेंचा काही तरी गैरसमज झाला आहे. मी त्यांना कामाची यादी देतो. शहरात दीड हजार कोटींची कामे सुरू आहेत. त्याचे ठेकेदार सांगावेत. आऊटर रिंगरोड सुरू आहे, त्याचे ठेकेदार त्यांनी सांगावेत. त्याची यादी देतो. त्यातही गुजरातचे कोण ते सांगावे. घाटाची कामे सुरू आहे. सर्व यादी देतो. बाहेर राज्यातील ठेकेदार कोण आहे हे त्यांनी सांगावं. ऑनलाईन टेंडर कोणीही भरू शकतो. तरी सुद्धा बाहेरचे ठेकेदार कोण हे त्यांनी सांगावं, असं आव्हानच महाजन यांनी दिलं.
कशाला राजकीय विधानं करता?
नाशिकमध्ये भ्रष्टाचार सुरू आहे, असं म्हणत आहेत. त्याचीही यादी देतो. पालिकेची कामे 20 ते 22 टक्के बिलो आहेत. दुरुस्तीची कामे 30 टक्के बिलो दिली आहेत. यात भ्रष्टाचार कसा असेल? फायबर केबलची कामे दिली, ती 42 टक्के बिलो आहेत. मग कशासाठी राजकीय विधानं करता? विनाकारण घाणेरडे आरोप करू नका. आपण आयआयटीची नियुक्ती केली आहे. आम्ही कोणत्याही टेंडरमध्ये गफलत केली नाही, असं ते म्हणाले.
Leave a Reply