सध्या सगळीकडे फोडा फोडीचं राजकारण सुरू असल्याचं पहायला मिळत आहे. राज्यात उद्धव ठाकरे यांना दोन मोठे धक्के बसले आहेत. एक म्हणजे एकाचवेळी 6 खासदारांनी पक्षातून बंडखोरी केली, त्यांनी शिवसेना शिंदे गटात प्रवेश केला आहे. तर दुसरीकडे सचिन आहिर यांनी देखील उद्धव ठाकरे यांची साथ सोडली आहे. शिवसेना ठाकरे गटात फूट पडली आहे, ऑपरेशन टायगरनंतर आता राज्यात दबक्या आवाजात ऑपरेशन तुतारीची देखील चर्चा सुरू झाली आहे. महाराष्ट्रात या सर्व घडामोडी घडत असताना तामिळनाडूनमधून मोठी बातमी समोर आली आहे. ती म्हणजे तामिळनाडूमध्ये मुख्यमंत्री विजय थलपती यांचा पक्ष असलेल्या टीव्हीकेने तामिळनाडूत विरोधी पक्ष असलेल्या ऑल इंडिया अन्ना द्रविड मुनेत्र कळघम (AIADMK) ला मोठा धक्का दिला आहे.
तामिळनाडूमध्ये एआयएडीएमकेमध्ये मोठी फूट पडली आहे. एआयएडीएमकेचे नेते आणि माजी मंत्री डॉ. सी. विजयभास्कर, एम. आर. विजयभास्कर आणि एम. एस. एम आनंद या तिघांनी आपल्या समर्थकांसह टीव्हीकेमध्ये प्रवेश केला आहे. हा विरोधी पक्षासाठी सर्वात मोठा धक्का मानला जात आहे. गुरूवारी मामल्लापुरम येथे आयोजित एका कार्यक्रमामध्ये या तीन नेत्यांनी टीव्हीकेमध्ये प्रवेश केला आहे. टीव्हीकेचे महासचिव एन. आनंद यांच्या उपस्थितीमध्ये या तीन नेत्यांनी टीव्हीकेमध्ये प्रवेश केला आहे. या नेत्यांनी टीव्हीकेमध्ये प्रवेश करताच विजय थलपती यांच्या कार्याचं तोंडभरून कौतुक केलं आहे.
या तीन बड्या नेत्याच्या पक्षप्रवेशामुळे टीव्हीके आता आणखी मजबूत झालं आहे. विधानसभा निवडणुकीमध्ये टीव्हीके सर्वात मोठा पक्ष ठरला होता. टीव्हीकेला राज्यात 107 जागा मिळाल्या होत्या, परंतु तरी देखील पक्षाकडे स्पष्ट बहुमत नव्हतं. अखेर थलपती विजय यांनी काँग्रेसच्या पाठिंब्यावर तामिळनाडूमध्ये सत्ता स्थापन केली. विजय यांचं सरकार म्हणजे तामिळनाडूमधील दोन्ही प्रस्थापित पक्षांसाठी मोठा धक्का देणारं आहे. त्यातच आता एआयएडीएमकेमध्ये मोठी फूट पडली आहे. थलपती विजय यांचे आमदार फोडून सरकार अल्पमतात आणण्याचा प्रयत्न सुरू होता, अशी माहिती समोर आली होती, मात्र आता थलपती विजय यांनी तामिळनाडूमध्ये मोठा डाव टाकला आहे.
Leave a Reply