कॉक्रोच जनता पार्टीने रविवारी पश्चिम बंगालमधून भाजपवर गंभीर आरोप केला आहे. पश्चिम बंगालमधील कॉक्रोच जनता पार्टीचा कार्यकर्ता शेख अब्दुल हफीजचे वडील जनाब माफिक यांच्या मृत्यूला भाजपचे कार्यकर्ते जबाबदार असल्याचा आरोप करण्यात आला आहे. अब्दुल सरकारी ‘स्कूल ठीक करो’ अभियानात सहभागी झाला होता. त्यामुळे भाजपच्या कार्यकर्त्यांनी त्याला घरात घुसून मारहाण केली. यावेळी भाजपच्या कार्यकर्त्यांच्या मारहाणीत सीजेपी कार्यकर्त्याच्या वडिलांचा मृत्यू झाल्याचा आरोप करण्यात येत आहे, कॉक्रोच जनता पार्टीच्या विद्यार्थी नेत्याच्या या गंभीर आरोपाने संपूर्ण देशात खळबळ उडाली आहे.
कॉक्रोच जनता पार्टीचे आशुतोष रांका यांनी म्हटलं की, आम्हाला सरकारी शाळांमध्ये सुधारणा घडवून आणायच्या आहेत. परंतु देशात भाजपचे गुंडे दहशत पसरवत आहेत. अब्दुलची फक्त एकच चूक होती की, त्याला गावातील सरकारी शाळांमध्ये सुधारणा घडवून आणायच्या होत्या. परंतु भाजपच्या गुंडानी मारहाण केल्याने त्याच्या वडिलांचा मृत्यू झाला. या घटनेच्या विरोधात मी, कॉक्रोच जनता पार्टीचे कार्यकर्ते बांकुरा येथे जाणार आहोत. आम्ही अब्दुलच्या कुटुंबाना न्याय मिळवून द्यायला जाणार आहोत. पश्चिम बंगालमधील कॉक्रोच जनता पार्टीच्या सर्व कार्यकर्त्यांना आवाहन आहे की, त्यांनी सोमवारी बांकुरा येथे हजर राहावे. आम्ही भाजपच्या गुंडांना घाबरणारे नाहीत’.
नेमकं काय घडलं?
बांकुरा जिल्ह्याच्या किरसुंडा भागात अब्दुल हफीज 13 ऑगस्ट रोजी गावातील सरकारी शाळा सुधारणा घडवून आणण्यासाठी अभियानात सहभागी झाला होता. परंतु यावरून भाजपचे कार्यकर्त्यांना राग आला. त्यानंतर सायंकाळी भाजप कार्यकर्त्यांनी घरात घुसून हफीजला मारहाण केली. अब्दुल हफीजने हॉस्पिटलमधून एक व्हिडिओ रेकॉर्ड केला. या व्हिडिओमध्ये अब्दुलने आरोप करताना सांगितलं की, शाळेच्या एका शिक्षकाने राजकीय संघटनेला माझ्या अभियानाविषयी सांगितलं. त्यानंतर माझ्यावर हल्ला झाला आहे’. अब्दुलने पुढे सांगितलं की, ‘मला व्हिडिओ पोस्ट करून माफी मागण्यास सांगत होते. परंतु नकार दिल्याने भाजप कार्यकर्त्यांनी मारहाण करण्यास सुरुवात केली. भाजप कार्यकर्त्यांच्या मारहाणीमुळे कोलकाता शहर सोडून पळ काढावा लागला’. दरम्यान, भाजपच्या कार्यकर्त्याच्या मारहाणीत जखमी झालेल्या अब्दुलच्या वडिलांचा 15 ऑगस्ट रोजी मृत्यू झाला, असा दावा त्याने केला आहे. अब्दुलच्या दाव्यामुळे पश्चिम बंगालमधील राजकीय वातावरण तापलं आहे.
Leave a Reply