राष्ट्रवादी काँग्रेस पक्षाच्या आगामी राजकीय वाटचालीसंदर्भात रणनीती आखण्याच्या हालचालींना वेग आला असतानाच आता महत्त्वाची माहिती समोर आली आहे. निवडणूक रणनीतीकार प्रशांत किशोर यांच्या टीमकडून राष्ट्रवादी काँग्रेस पक्षाच्या कोअर कमिटीसमोर आगामी काळातील पक्षाची राजकीय वाटचाल कशी असावी, यासंदर्भात सादरीकरण करण्यात आल्याची माहिती सूत्रांनी दिली आहे. मात्र, यापूर्वी प्रशांत किशोर यांच्या टीमकडून करण्यात आलेल्या सूचनांवर पक्षाकडून अपेक्षित अंमलबजावणी होत नसल्यानेही समोर आले आहे. याबाबत सविस्तर माहिती जाणून घेऊयात.
प्रशांत किशोर यांच्या सूचनांचे पालन नाही
समोर आलेल्या माहितीनुसार, मागील कोअर कमिटीच्या बैठकीतही प्रशांत किशोर यांच्या टीमकडून राष्ट्रवादी काँग्रेसच्या आगामी राजकीय रणनीतीबाबत काही महत्त्वाच्या सूचना करण्यात आल्या होत्या. पक्षाची संघटनात्मक रचना, नेतृत्व आणि आगामी राजकीय वाटचालीसंदर्भात या सूचना असल्याचे सांगितले जात आहे. मात्र, या सूचनांपैकी कोणत्याही सूचनेची अपेक्षित पद्धतीने अंमलबजावणी होत नसल्याने प्रशांत किशोर यांच्या टीमसमोरच पक्षासाठी रणनीतीचे काम नेमक्या कोणत्या दिशेने पुढे न्यावे, असा प्रश्न निर्माण झाल्याची माहिती सूत्रांनी दिली आहे.
राष्ट्रवादीत मतभेद?
विशेष म्हणजे, पक्षाच्या प्रदेशाध्यक्षांसह इतर काही प्रमुख पदांवर बदल करण्यात यावेत, अशी सूचना प्रशांत किशोर यांच्या टीमकडून करण्यात आल्याचे समोर आले होती. मात्र, ही सूचना कोअर कमिटीने मान्य केली नसल्याची माहिती समोर आली आहे. त्यामुळे पक्षाच्या नेतृत्वातील बदल आणि संघटनात्मक पुनर्रचनेच्या मुद्द्यावर मतभेद असल्याचे बोलले जात आहे.
आगामी निवडणुकांच्या पार्श्वभूमीवर पक्षाची संघटनात्मक ताकद वाढवणे, मतदारांपर्यंत पक्षाची भूमिका प्रभावीपणे पोहोचवणे आणि योग्य राजकीय रणनीती आखणे यासाठी प्रशांत किशोर यांच्या टीमची भूमिका महत्त्वाची मानली जात आहे. मात्र, रणनीतीकारांकडून करण्यात आलेल्या सूचनांची अंमलबजावणीच होत नसेल, तर पुढील रणनीती निश्चित करण्याचे आव्हान निर्माण होऊ शकते.
प्रशांत किशोर यांच्याकडून पुन्हा सूचना
दरम्यान, प्रशांत किशोर यांच्या टीमने नुकतेच कोअर कमिटीसमोर केलेले सादरीकरण आणि त्यामध्ये मांडलेल्या सूचनांवर पक्षाकडून कोणता निर्णय घेतला जाणार, याकडे आता राजकीय वर्तुळाचे लक्ष लागले आहे. नेतृत्वबदलाच्या सूचनेवर पक्षाची भूमिका काय राहणार आणि आगामी काळात प्रशांत किशोर यांच्या टीमच्या रणनीतीनुसार पक्ष प्रत्यक्षात किती बदल करणार, हे पाहणे महत्त्वाचे ठरणार आहे.
Leave a Reply