मुसळधार पावसामुळे पुणे-मुंबई द्रुतगती मार्ग तसंच जुना मुंबई-पुणे महामार्ग या दोन्ही मार्गांवर दरडी कोसळण्याच्या घटना घडल्या होत्या. यामुळे दोन्ही महामार्गांवरील वाहतूक गंभीरपणे प्रभावित झाली होती. पुणे यशवंतराव चव्हाण द्रुतगती महामार्गावरील मिसिंग लिंक परिसरात दरड कोसळल्यामुळे आणि महामार्गावर अनेक ठिकाणी पाणी साचल्यामुळे सोमवारी सकाळपासूनच वाहतुकीवर मोठा परिणाम झाला होता. त्यामुळे महामार्गावर वाहनांच्या लांबच लांब रांगा लागल्या होत्या. अशाच एका वाहनात मराठी मालिकांमधील प्रसिद्ध अभिनेत्री धनश्री काडगांवकर अडकली होती. धनश्रीची गाडी तब्बल नऊ तास या महामार्गावर अडकून पडली होती. त्यात तिला मासिक पाळी आली होती आणि गाडी अडकल्यामुळे ती बाथरुमलाही जाऊ शकत नव्हती.
धनश्रीने तिच्या इन्स्टाग्राम अकाऊंटवर याबद्दलची एक पोस्ट लिहिली आहे. त्याचसोबत महामार्गाचा व्हिडीओसुद्धा शेअर केला आहे. तब्बल नऊ तासांच्या प्रवासानंतर धनश्री तिच्या शूटिंगच्या ठिकाणी सुरक्षितरित्या पोहोचली. देवापुढं इतकीच प्रार्थना की कोणाचं जगणं मुश्किल होईल इतकं मोठं आणि भयानक काही होऊ देऊ नको, अशी प्रार्थना तिने केली.
धनश्रीची पोस्ट-
‘मी नेहमीच दुसऱ्या बाजूला असायचे, म्हणजे मुसळधार पावसामुळे एक्स्प्रेस वेवरील ट्रॅफिकच्या बातम्या बघणं असो किंवा काही अपघात, दरड कोसळणं असो.. पण काल (6 जुलै 2026) मी अशाच एका घटनेचा भाग होते. अशा पद्धतीने अडकणं हे अत्यंत थकवणारं आणि त्रासदायक असतं. मला मासिक पाळी आली होती. वॉशरुमला जाण्याची मला तीव्र इच्छा होती, पण मी जाऊ शकत नव्हते. फुड कोर्टवर उतरून काहीतरी खायचं होतं, पण तेही करू शकत नव्हते,’ अशा शब्दांत तिने अनुभव सांगितला.
धनश्रीने शेअर केलेला व्हिडीओ-
View this post on Instagram
या पोस्टमध्ये तिने पुढे लिहिलं, ‘गुडघाभर पाणी साचलं होतं, कुठं ओलं व्हा, आजारपण आता परवडणारं नाही, कारण खूप शूट लागलं आहे. मॅडम पुण्याला परत जाऊया, असं माझं ड्राइव्हर बोलत होता. पण कलाकार हे त्यांच्या कमिटमेंटबद्दल खूप काळजी घेतात आणि टेलिकास्ट अडकला होता. अखेर हळूहळू का होईना मी सुरक्षितरित्या शूटिंगच्या ठिकाणी पोहोचले. निसर्गापुढे कोणाचं काहींचं चालत नाही, पण देवापुढं इतकीच प्रार्थना की कोणाचं जगणं मुश्किल होईल इतकं मोठं आणि भयानक काही होऊ देऊ नको. प्रत्येकाने सुरक्षित राहा.’ धनश्रीच्या या पोस्टवर नेटकऱ्यांनी विविध प्रतिक्रिया दिल्या आहेत.
Leave a Reply