देशभरासह महाराष्ट्राच्या अनेक भागांमध्ये मुसळधार पाऊस पडत आहे. पावसामुळे प्रत्येकाच्या घरात अनेक भागांमध्ये दमटपणा आणि ओलावा निर्माण होत असतो. अशातच पावसाळ्याच्या दिवसांमध्ये घराची स्वच्छता राखली नाही, तर बॅक्टेरिया आणि व्हायरससारख्या जंतूंची वाढ होऊ शकते आणि त्यांच्या संपर्कात आल्यास संसर्ग किंवा ॲलर्जी होऊ शकते. त्यामुळे पावसाळ्यात घर स्वच्छ आणि कोरडे ठेवणे अत्यंत महत्त्वाचे आहे. स्वयंपाकघर, स्नानगृह, फरशी आणि वारंवार स्पर्श होणाऱ्या इतर जागा स्वच्छ करण्याकडे विशेष लक्ष द्या.
घराची स्वच्छता म्हणजे केवळ दिसणारी घाण काढणे नव्हे, तर जंतूंना दूर ठेवणे देखील आहे. ओले कपडे, भांडी पुसण्याचे कापड आणि साफसफाई करण्यासाठी वापरले जाणारे साहित्य जास्त वेळ वापरणे टाळावे. चला तर मग आजच्या लेखात पावसाळ्यात आपले घर जंतूंपासून कसे सुरक्षित ठेवावे आणि स्वच्छता करताना कोणती खबरदारी घ्यावी हे जाणून घेऊयात.
पावसाळ्यात आपल्या घराला जंतूंपासून सुरक्षित ठेवण्यासाठी या टिप्स करा फॉलो
वारंवार स्पर्श होणाऱ्या जागा स्वच्छ करा
हेल्थलाइननुसार, दाराच्या कड्या, लाईटची बटणे, जिन्याचे कठडे, टेबल आणि काउंटर यांसारख्या जागा स्वच्छ करा. या भागांना वारंवार स्पर्श केला जातो आणि त्यावर जंतू असू शकतात. ही स्वच्छता कोमट पाणी आणि साबणाने किंवा क्लिनरने करता येते.
स्वयंपाकघराच्या स्वच्छतेकडे लक्ष द्या
स्वयंपाकघरातील ओटा, सिंक, स्टोव्ह आणि इतर भाग स्वच्छ ठेवा. जेवण बनवताना वापरलेली भांडी लगेच धुवा आणि भांडी पुसण्याचे कापड ओले ठेवण्याऐवजी पूर्णपणे कोरडे करा. जंतूंचा एका वस्तूवरून दुसऱ्या वस्तूवर प्रसार होऊ नये म्हणून, कच्चे मांस आणि भाज्यांसाठी एकच कटिंग बोर्ड वापरणे टाळा.
बाथरूम कोरडे ठेवण्याचा प्रयत्न करा
बाथरूममधील जास्त आर्द्रतेमुळे बुरशीची वाढ होऊ शकते. अंघोळीनंतर फरशी, टब किंवा शॉवरमधील ओले पृष्ठभाग पुसून घ्या आणि बाथरूम हवेशीर ठेवा. तसेच, टॉयलेट, सिंक आणि इतर पृष्ठभाग नियमितपणे स्वच्छ करा. यामुळे जंतू आणि बुरशीची वाढ रोखण्यास मदत होऊ शकते.
या भागांवर धूळ आणि घाण साचू देऊ नका
खिडक्या, फर्निचर, शेल्फ आणि इतर ठिकाणी साचलेली धूळ स्वच्छ करा. आधी धूळ झटकून घ्या, त्यानंतर गरजेनुसार फरशी झाडून, व्हॅक्यूम करून आणि पुसून घ्या. यामुळे तुमच्या घरात धूळ आणि घाण साचण्याचे प्रमाण कमी होण्यास मदत होऊ शकते.
स्वच्छतेचे कापड आणि स्पंज स्वच्छ ठेवा
भांडी घासण्याचे स्पंज, भांडी पुसण्याचे कापड, फरशी पुसण्याचे मॉप आणि साफसफाईच्या कापडांवर जंतू जमा होऊ शकतात. त्यामुळे यांच्या वापरल्यानंतर ते पूर्णपणे धुऊन पिळून घ्या आणि लवकर सुकतील अशा ठिकाणी ठेवा. त्यांना जास्त वेळ ओले ठेवणे टाळा. तसेच बाथरूम आणि स्वयंपाकघरासाठी वेगवेगळे कापड ठेवावे.
घर स्वच्छ करताना या गोष्टी लक्षात ठेवा
घर स्वच्छ करताना आधी वस्तू जागेवर ठेवा आणि मग धूळ झटकून घ्या. त्यानंतर, आवश्यकतेनुसार व्हॅक्यूम क्लिनरने किंवा झाडूने साफसफाई करा. स्वयंपाकघर किंवा इतर पृष्ठभाग पुसण्यासाठी शौचालय स्वच्छ करण्याचे कापड वापरू नका. स्वयंपाकघर आणि स्नानगृहासाठी वेगवेगळे कापड वापरा. भांडी घासण्याचे स्पंज, फरशी पुसण्याचे मॉप आणि मायक्रोफायबर कापड वापरल्यानंतर धुऊन पूर्णपणे कोरडे करा.
दमट जागा जास्त वेळ ओल्या ठेवणे टाळा. संपूर्ण घरात योग्य हवा फिरती राहील याकडे लक्ष ठेवा, कारण कोरडे आणि हवेशीर घर जंतू आणि बुरशी कमी करण्यास मदत करू शकते. ब्लीच किंवा इतर साफसफाईची केमिकल वापरत असल्यास ती या दिवसात वापरणे टाळा, कारण यामुळे धोकादायक वायू तयार होऊ शकतात.
Leave a Reply