अंडरवर्ल्ड डॉन, कुख्यात दाऊद इब्राहिम याचा खास मानला जाणार हस्तक आणि इंटरपोलचा वाँटेड गुंड अख्तर मर्चंट याला दिल्ली विमानतळावरून अटक करण्यात आली आहे. मर्चंट हा गेल्या 3 वर्षांपासून फरार होता. 2023 साली काशीमीरा येथील बेकरीवर गोळीबार केल्याचा त्याच्यावर आरोप आहे, याच प्रकरणात तो वाँटेड होता. इंटरपोलच्या वाँटेड लिस्टमध्येही त्याच्या नावाचा समावेश होता. इंटरपोलच्या सूचननेनुसार, पोलिसांनी दिल्ली एअरपोर्टवरून त्याला बेड्या ठोकत अटक केल्याची माहिती समोर आली आहे. अख्तर मर्चंट हा परदेशातून भारतात येत होता, तेव्हाच पोलिसांनी त्याच्या मुसक्या आवळल्याचे समजते.
मुंबईतील काशीमीर पोलिस हे 2023 सालापासूनच आरोपी अख्तर मर्चंटच्या शोधात होते. खंडणी उकळणे आणि गोळीबार करणे असे आरोप त्याच्यावर आहेत. दिल्ली विमातळावर अटक केल्यानंतर आता अख्तरला मुंबईत आणण्यात येणार आहे.
पप्पू पेजरचाही समावेश, गेल्या वर्षी अटक
पोलिसांनी दिलेल्या माहितीनुसार, 2023 साली काशीमीरा भागातील ‘इंटरनॅशनल बेकरी’वर झालेल्या गोळीबार प्रकरणात अख्तर मर्चंट आणि पप्पू पेजर हे दोघे मुख्य सूत्रधार होते. क्राईम ब्रांचने गेल्या वर्षीच पप्पू पेजरला अटक केली होती, मात्र अख्तर मर्चंट हा तर तेव्हापासूनच फरार होता. मीरा रोडच्या काशीमीरा भागात राहणाऱ्या बाबू नावाच्या गुटखा विक्रेत्याकडून खंडणी उकळण्यासाठी त्याला फोन करण्यात आला होता अशी माहिती तपासात समोर आली होती.
खंडणी दिली नाही म्हणून बेकरीवर गोळीबार
मात्र खंडणी न दिल्याने बाबू याच्या बेकरीवर गोळीबार करण्यात आला होता. या प्रकरणी काशीमीरा पोलिस स्टेशनमध्ये गुन्हा दाखल करण्यात आला होता. पोलिसांनी भारतीय न्याय संहितेच्या कलम 307, 384, 120(B), 34 अन्वये, तसेच आर्म्स ॲक्ट आणि मोक्का (MCOCA) अंतर्गत कारवाई सुरू केली. इंटरपोलच्या संकेतस्थळावरील ‘वॉन्टेड’ (हवे असलेल्या) गुन्हेगारांच्या यादीत अख्तर मर्चंटचे नाव सहाव्या क्रमांकावर आहे
इंटरपोलकडून मिळाली होती अख्तरबद्दल खबर
गोळीबारानंतर अख्तर मर्चंट फरार होता. इंटरपोलच्या संकेतस्थळावरील ‘वॉन्टेड’ (हवे असलेल्या) गुन्हेगारांच्या यादीत अख्तर मर्चंटचे नाव सहाव्या क्रमांकावर आहे . तो परदेशात आहे अशी ठोस माहिती, इंटरपोलमार्फत मीरा-भाईंदर वसई-विरार पोलीस दलाच्या गुन्हे शाखेला मिळाली होती. त्यानंतर, दिल्ली विमानतळावर त्याच्या हालचालींवर बारीक लक्ष ठेवण्यात आलं आणि परदेशातून त्याने भारतात पहिलं पाऊल टाकताच मर्चंटला बेड्या ठोकून अटक करण्यात आली. दिल्लीतील अटकेनंतर अख्तर मर्चंटला उद्या मीरा-भाईंदर येथे आणलं जाईल, तिथेच पोलीसांकडून त्याची कसून चौकशी केली जाईल.
Leave a Reply