रणजीत इंगळे, प्रतिनिधी : मुंबईच्या राजकारणात खळबळ उडवणारी बातमी समोर आली आहे. शिवसेना उद्धव बाळासाहेब ठाकरे पक्षाच्या वॉर्ड क्रमांक 191 च्या नगरसेविका विशाखा राऊत यांचे जात प्रमाणपत्र रद्द करण्यात आले आहे. जिल्हा जात प्रमाणपत्र समितीने त्यांचे जात प्रमाणपत्र अवैध ठरवले आहे. जात प्रमाणपत्र रद्द झाल्यानंतर विशाखा राऊत यांनी पहिली प्रतिक्रिया दिली असून शिवसेनेचे नेते सदा सरवणकर यांच्यावर गंभीर आरोप केले आहेत. याबाबत सविस्तर माहिती जाणून घेऊयात.
नगरसेवक पदावर टांगती तलवार
जिल्हा जात प्रमाणपत्र समितीने मुंबई महापालिकेच्या वॉर्ड क्रमांक 191 च्या नगरसेविका विशाखा राऊत यांचे जात प्रमाणपत्र पद रद्द करण्याचा निर्णय घेतला आहे. मात्र, या निर्णयाचा विषय अद्याप महापालिका सभागृहासमोर आलेला नाही. त्यामुळे राऊत यांचे नगरसेवक पद रद्द करण्याबाबतचा अंतिम निर्णय अद्याप झालेला नाही. हा विषय सभागृहात मांडल्यानंतर त्यावर चर्चा होऊन पुढील निर्णय घेतला जाण्याची शक्यता आहे.
जात समितीवर दबाव होता – राऊत
जात प्रमाणपत्र समितीच्या निर्णयानंतर विशाखा राऊत यांनी म्हटले की, ‘माझ्यावर दबाव नव्हता, त्या जिल्हा जात समितीवर दबाव होता. माझे पेपर व्यवस्थित आहेत, माझे आजोबा पालघरचे होते, म्हणून तिकडून मी सर्टिफिटेक काढले. त्यांच्यावर वेगळा दबाव होता, दबावातून हे सर्व झाले. मी 1911 आणि 1937 चा पुरावा दिला, मोडी लिपीचा पुरावा दिला. आजोबा पणजोबाचे पुरावे दिले असताना सर्टिफिटेक रद्द केले.’
सदा सरवणकर यांच्यावर आरोप
पुढे बोलताना विशाखा राऊत यांनी, ‘भाजपकडून दबाव नाही, शिंदेसेनेकडून दबाव आहे. मी कायदेशीर लढाई लढणार. सदा सरवणकर एक महिना आगोदर सांगून गेले, माझी मुलगी नगरसेवक होणार म्हणून. त्यांना स्वप्न पडले होते का? शिंदे यांनी स्क्रूटीनी समितीवर दबाव टाकला तसा दबाव मुंबई महापालिका मध्ये टाकतील असा आरोप केला आहे. आता एकनाथ शिंदे यांच्या शिवसेनेकडून राऊत यांना नेमकं काय उत्तर दिले जाते ते पाहणे महत्त्वाचे ठरणार आहे.
Leave a Reply