बॉलिवूडचा ‘हीरो नंबर वन’ म्हणून ओळखला जाणारा अभिनेता गोविंदा आणि त्यांची पत्नी सुनीता आहुजा गेल्या काही दिवसांपासून त्यांच्या वैयक्तिक आयुष्यामुळे चर्चेत आहेत. दोघांच्या नात्याबाबत विविध बातम्या समोर येत असतानाच आहुजा कुटुंबासाठी एक आनंदाची बातमी समोर आली आहे. गोविंदा आणि सुनीता आहुजा यांचा मुलगा यशवर्धन आहुजा आता बॉलिवूडमध्ये पदार्पण करण्यासाठी सज्ज झाला आहे.
यशवर्धनच्या पहिल्याच चित्रपटाचे वैशिष्ट्य म्हणजे या सिनेमात त्याची आई सुनीता आहुजा देखील त्याच्यासोबत स्क्रीन शेअर करणार आहे. विशेष म्हणजे, सुनीता या चित्रपटात यशवर्धनच्या आईचीच भूमिका साकारताना दिसणार आहेत. त्यामुळे आई आणि मुलाची ही जोडी पहिल्यांदाच मोठ्या पडद्यावर एकत्र पाहायला मिळणार आहे.
‘हीरो की हॉररइन’मधून यशवर्धनचा डेब्यू
यशवर्धनच्या पहिल्या चित्रपटाच्या नावाचीही घोषणा करण्यात आली आहे. ‘हीरो की हॉररइन’ असे या चित्रपटाचे नाव आहे. हा सिनेमा हॉरर-कॉमेडी प्रकारातील असून, चित्रपटाची निर्मिती एकता कपूर, शोभा कपूर आणि अमर बुटाला करत आहेत. तर ‘हाउसफुल’ आणि ‘हिम्मतवाला’ यांसारख्या चित्रपटांचे दिग्दर्शन केलेले दिग्दर्शक साजिद खान या सिनेमाची धुरा सांभाळणार आहेत.
या चित्रपटात यशवर्धन आहुजासोबत ‘लापता लेडीज’ फेम अभिनेत्री नितांशी गोयल मुख्य भूमिकेत दिसणार आहे. नितांशीने अल्पावधीतच आपल्या अभिनयाने प्रेक्षकांच्या मनात वेगळी ओळख निर्माण केली आहे. त्यामुळे यशवर्धन आणि नितांशीची ऑनस्क्रीन जोडी आणि त्यांची केमिस्ट्री पाहण्यासाठी प्रेक्षक उत्सुक आहेत.
या दिवशी चित्रपट होणार प्रदर्शित
या दोघांव्यतिरिक्त जेमी लीवर, चंकी पांडे, बृजेंद्र काला आणि सिमरत कौर रंधावा यांसारखे कलाकारही या चित्रपटाचा भाग आहेत. ‘हीरो की हॉररइन’ हा चित्रपट 7 जानेवारी 2027 रोजी चित्रपटगृहांमध्ये प्रदर्शित होणार आहे.
यशवर्धनच्या बॉलिवूड पदार्पणाबाबत सुनीता आहुजा यांनी यापूर्वीच आनंद व्यक्त केला आहे. एएनआयशी बोलताना त्यांनी सांगितले होते की, त्या यशवर्धनसोबत चित्रपटात काम करत आहेत आणि विशेष म्हणजे त्याच्याच आईची भूमिका साकारत आहेत.
सुनीता यांनी निर्माती एकता कपूर यांचेही कौतुक केले. यशवर्धनच्या चित्रपटात त्याच्या आईची भूमिका साकारण्याबाबत बोलताना त्यांनी आनंद व्यक्त केला आणि कदाचित इंडस्ट्रीमध्ये पहिल्यांदाच आई आणि मुलगा एकाच प्रोजेक्टमधून एकत्र लॉन्च होत असल्याचेही म्हटले होते.
Leave a Reply