अमरावतीच्या परतवाडा परिसरातील तरुणींना प्रेमाच्या जाळ्यात ओढून त्यांचे लैंगिक शोषण करणे आणि त्यानंतर ब्लॅकमेलिंगच्या उद्देशाने अश्लील व्हिडीओ बनवून ते सोशल मीडियावर व्हायरल केल्याची धक्कादायक घटना समोर आली आहे. या घटनेने संपूर्ण शहरात खळबळ उडाली आहे. या प्रकरणी मुख्य सूत्रधार अहमद अयानसह 6 जणांना अटक करण्यात आली आहे. आता या प्रकरणाचे धागेदोरे अमरावतीच्या कठोरा नाका परिसरातील एका रेसिडेन्सीपर्यंत पोहोचले आहेत. नुकत्याच झालेल्या पोलीस तपासातून याबद्दलची धक्कादायक माहिती समोर आली आहे.
पोलिसांच्या तपासादरम्यान समोर आलेल्या माहितीनुसार, मुख्य आरोपी अहमद अयान याची कार्यपद्धती अत्यंत पद्धतशीर आणि गुन्हेगारी स्वरूपाची होती. तो पीडित तरुणींशी ओळख वाढवून त्यांना विश्वासात घ्यायचा. त्यानंतर तो अमरावतीच्या कठोरा नाका भागातील एका नामांकित रेसिडेन्सीमधील तिसऱ्या मजल्यावरील फ्लॅटवर त्यांना घेऊन जायचा. या फ्लॅटचा वापर तो स्वतःच्या विकृत कृत्यांसाठी अड्डा म्हणून करत होता.
विशेष म्हणजे, या कृत्यासाठी तो आपल्या मित्रांचाही वापर करत होता. पीडितांना फ्लॅटवर आणण्यासाठी तो स्वतःच्याच मित्राला ५०० रुपयांचे आमिष दाखवत त्याला सहभागी करून घ्यायचा. या फ्लॅटवर अनेक तरुणींना वारंवार आणले जात असल्याचे समोर आले आहे. त्यामुळे या टोळीचे जाळे किती मोठे आहे, याचा शोध पोलीस घेत आहेत.
पोलिसांकडून पुराव्यांचा साठा हस्तगत
या घटनेची माहिती मिळताच पोलिसांनी युद्धपातळीवर हालचाली सुरू केल्या. काल पोलिसांनी संबंधित फ्लॅटवर धडक दिली. तसेच परिसराची झडती घेतली. या कारवाईत पोलिसांना मोठे यश मिळाले असून, आतापर्यंत एकूण पाच मोबाईल फोन जप्त करण्यात आले आहेत. या मोबाईलच्या तांत्रिक तपासणीत धक्कादायक बाबी समोर आल्या आहेत.
आतापर्यंतच्या तपासात पोलिसांनी १८ अश्लील व्हिडिओ आणि ३९ आक्षेपार्ह फोटो हस्तगत केले आहेत. यावेळी मुख्य आरोपी अहमद अयानसह ६ जणांना अटक करण्यात आली आहे, तर अन्य ४ संशयितांची सखोल चौकशी सुरू आहे. या प्रकरणातील आरोपींचे धागेदोरे खूप खोलवर असावेत, अशी शक्यता वर्तवण्यात येत आहे. या प्रकरणाचा तपास कोणत्याही राजकीय किंवा बाह्य दबावाखाली येऊ नये, तसेच तपासाची दिशा भरकटू नये, यासाठी वरिष्ठ पातळीवरून विशेष खबरदारी घेतली जात आहे.
Leave a Reply