अमेरिकेचे राष्ट्राध्यक्ष डोनाल्ड ट्रम्प यांच्या सुरक्षेच्या दृष्टीने एक अत्यंत धक्कादायक आणि खळबळजनक घटना समोर आली आहे. रविवारी अमेरिकेची राजधानी वॉशिंग्टन डीसी येथील ‘व्हाईट हाऊस’च्या अत्यंत सुरक्षित मानल्या जाणाऱ्या परिसराबाहेर मोठा गोळीबार झाला. विशेष म्हणजे, ज्यावेळी हा गोळीबार झाला तेव्हा राष्ट्राध्यक्ष ट्रम्प व्हाईट हाऊसमध्येच उपस्थित होते. प्राथमिक अंदाजानुसार हा ट्रम्प यांच्या हत्येचा कट असल्याचा संशय व्यक्त केला जात आहे.
अचानक २५ ते ३० गोळ्या झाडल्याचा आवाज
‘रॉयटर्स’ आणि ‘सीबीएस न्यूज’ने दिलेल्या माहितीनुसार, व्हाईट हाऊसच्या अगदी जवळ असलेल्या १७ वी स्ट्रीट आणि पेनसिल्व्हेनिया अव्हेन्यू नॉर्थवेस्ट या भागात एका संशयिताने गोळीबार सुरू केला. एका प्रत्यक्षदर्शी पत्रकाराच्या मते, घटनास्थळी अचानक २५ ते ३० गोळ्या झाडल्याचा मोठा आवाज आला. यानंतर अमेरिकेच्या ‘सीक्रेट सर्विस’च्या जवानांनी तत्काळ जवाबी कारवाई केली. जवानांनी केलेल्या गोळीबारात संशयित हल्लेखोर गंभीर जखमी झाला. त्याला तातडीने रुग्णालयात नेले असता उपचारादरम्यान त्याचा मृत्यू झाला. या चकमकीत एका सामान्य नागरिकालाही दुखापत झाली आहे, मात्र सुदैवाने कोणताही जवान किंवा सुरक्षा रक्षक जखमी झालेला नाही.
गोळीबाराच्या या घटनेनंतर सीक्रेट सर्विसच्या स्नाइपर पथकांनी सुरक्षेचा उपाय म्हणून तत्काळ व्हाईट हाऊसच्या छतावर पोझिशन घेतली आणि संपूर्ण परिसरावर उंचावरून नजर ठेवली. याशिवाय, व्हाईट हाऊसचा ‘नॉर्थ लॉन’ परिसर पूर्णपणे रिकामा करण्यात आला आणि तिथे अत्याधुनिक शस्त्रास्त्रांसह सशस्त्र जवान तैनात करण्यात आले. बाहेरील पत्रकारांना तातडीने आत बोलावून ‘प्रेस ब्रीफिंग रूम’ बंद करण्यात आली. अधिकाऱ्यांनी दिलेल्या माहितीनुसार सध्या परिस्थिती पूर्णपणे नियंत्रणात आहे.
सोशल मीडियाद्वारे ‘एफबीआय’चे संचालकांची माहिती
‘एफबीआय’चे संचालक काश पटेल यांनी सोशल मीडिया पोस्टद्वारे या गोळीबाराच्या घटनेला दुजोरा दिला आहे. त्यांनी स्पष्ट केले की, एफबीआयचे एक विशेष पथक घटनास्थळी पोहोचले असून ते सीक्रेट सर्विसला तपासात मदत करत आहेत. हा गोळीबार डोनाल्ड ट्रम्प यांच्यावर चालून आलेला थेट हल्ला होता का, या दिशेने सध्या कसून तपास सुरू असून तपासातील नवीन माहिती लवकरच जनतेसमोर मांडली जाईल, असेही पटेल यांनी सांगितले आहे.
Leave a Reply