अमरावतीच्या परतवाडा येथील तरुणींचे लैंगिक शोषण आणि अश्लील व्हिडीओ व्हायरल केल्याच्या धक्कादायक प्रकरणाने संपूर्ण महाराष्ट्र हादरला आहे. या प्रकरणातील मुख्य आरोपी अयान अहमद सध्या पोलीस कोठडीत आहे. गेल्या काही दिवसांपासून अयान अहमदची चौकशी सुरु आहे. या चौकशीदरम्यान अनेक नवनवीन आणि थक्क करणारे खुलासे दररोज समोर येत आहेत. आता अयान अहमदच्या ऐशो आरामाच्या आयुष्याबद्दलचे काही व्हिडिओ सोशल मीडियावर व्हायरल झाले आहे. त्यामुळे मोठी खळबळ उडाली आहे.
आरोपी अयान अहमद याचे सोशल मीडियावरील रिल्स समोर आले आहेत. ज्यात तो स्वतःचे वर्चस्व दाखवण्याचा प्रयत्न करताना दिसतो. यातील एका व्हिडीओमध्ये तो अलिशान थार (Thar) गाडीतून फिरताना दिसत आहे. यावेळी त्याच्या हातात पिस्तूल, तसेच कारमध्ये आयफोनच्या फोनचा ढीग पाहायला मिळत आहे. विशेष म्हणजे, एका रिलमध्ये ये जरूर कुछ बडा करेगा… क्योंकि इसे जिंदगी से ज्यादा अपनी जीत प्यारी है, अशा अर्थाचे संवादही वापरण्यात आले आहेत.
नवी कोरी थार गाडी कोणाच्या मालकीची?
या व्हिडीओनंतर पोलिसांसमोर अनेक प्रश्न उभे राहिले आहेत. अयान वापरत असलेली नवी कोरी थार गाडी नेमकी कोणाच्या मालकीची आहे? तो केवळ या गाड्यांचा वापर करायचा की त्या त्याच्या नावावर आहेत, याचा तपास पोलिसांनी सुरु केला आहे. या व्हिडीओमध्ये दिसणाऱ्या पिस्तूलचे अयानकडे कायदेशीर परवाना (License) होते का? की हे अवैध शस्त्र होते? एक तरुण इतक्या महागड्या गाड्या, चार-पाच आयफोन आणि रोख रक्कमेची बंडले कोठून आणत होता? यामागे एखादे मोठे रॅकेट तर नाही ना, अशी शंकाही पोलिसांकडून व्यक्त केली जात आहे.
अमरावती पोलिसांकडून सखोल तपास सुरु
दरम्यान परतवाडा येथील तरुणींच्या लैंगिक शोषणाचे हे प्रकरण अत्यंत गंभीर असून, यात रोज नवीन धागेदोरे मिळत आहेत. आरोपीने किती मुलींना आपल्या जाळ्यात ओढले आणि त्याचे कनेक्शन कोणाकोणाशी आहे, याचा सखोल तपास अमरावती पोलीस करत आहेत. त्यासोबतच अयानच्या आर्थिक व्यवहारांची आणि त्याच्या आलिशान राहणीमानामागचे खरे सूत्रधार कोण याचा शोध सध्या घेतला जात आहे.
Leave a Reply