दाक्षिणात्य चित्रपटसृष्टीतील लोकप्रिय अभिनेत्री समंथा रुथ प्रभू सध्या तिच्या आयुष्यातील एका खास टप्प्यात असल्याचं सांगितलं जात आहे. त्याचवेळी ती एका नव्या आणि हटके प्रोजेक्टच्या तयारीत व्यस्त आहे. समंथा आता अभिनयासोबतच एका कुकिंग रिअॅलिटी शोचं सूत्रसंचालन करताना दिसणार आहे. ‘सेलिब्रिटी मास्टरशेफ तमिळ’ या शोसाठी समंथाची निवड करण्यात आली आहे.
समंथासाठी हा प्रोजेक्ट विशेष महत्त्वाचा आहे, कारण आतापर्यंतच्या तिच्या कामापेक्षा या शोमधील तिची भूमिका पूर्णपणे वेगळी असणार आहे. या कुकिंग रिअॅलिटी शोमध्ये तमिळ चित्रपटसृष्टीतील अनेक प्रसिद्ध कलाकार सहभागी होणार असून ते किचनमध्ये विविध पदार्थ बनवताना आणि एकमेकांना वेगवेगळ्या आव्हानांचा सामना करताना पाहायला मिळणार आहेत.
नव्या प्रोजेक्टसाठी समंथा उत्सुक
‘सेलिब्रिटी मास्टरशेफ तमिळ’मध्ये सूत्रसंचालक म्हणून काम करण्याबाबत समंथाने उत्साह व्यक्त केला आहे. या शोबद्दल प्रेक्षकांना सांगण्यासाठी आपण बऱ्याच काळापासून वाट पाहत असल्याचं तिने सांगितलं.
‘मी या शोबद्दल प्रेक्षकांना सांगण्याची बऱ्याच काळापासून वाट पाहत होते. ‘सेलिब्रिटी मास्टरशेफ तमिळ’सारखा प्रोजेक्ट मी यापूर्वी कधीच केलेला नाही आणि हीच गोष्ट मला या शोच्या दिशेने आकर्षित करणारी ठरली’ असं समंथाने म्हटलं आहे.
‘खाणं म्हणजे फक्त भूक भागवणं नाही’
शोच्या निमित्ताने समंथाने खाण्याबद्दलची आपली विचारसरणीदेखील व्यक्त केली. तिच्या मते, खाणं हे केवळ भूक भागवण्याचं साधन नसून त्यातून नाती जोडली जातात आणि सुंदर आठवणी निर्माण होतात.
‘खाणं म्हणजे फक्त भूक भागवण्याचा मार्ग नाही, तर लोकांना जवळ आणण्याचा आणि त्यांच्यासोबत आठवणी निर्माण करण्याचा एक सुंदर मार्ग आहे. एखादी व्यक्ती जेव्हा स्वयंपाक करते, तेव्हा तिच्यातील असा एखादा पैलू समोर येऊ शकतो, जो सामान्यपणे कॅमेऱ्यासमोर पाहायला मिळत नाही’ असं समंथाने सांगितलं.
कलाकार किचनमध्ये कसे काम करणार?
तमिळ चित्रपटसृष्टीतील आवडते कलाकार किचनमध्ये कशाप्रकारे काम करतात, हे पाहण्याची समंथालाही उत्सुकता आहे. कलाकार स्वयंपाकाची जबाबदारी स्वीकारल्यानंतर किती जोखीम घेतात, चुका झाल्यानंतर त्यातून कशाप्रकारे शिकतात, हे पाहणं रंजक ठरेल, असं तिने म्हटलं.
या शोमध्ये सहभागी होणाऱ्या कलाकारांना वेगवेगळ्या कुकिंग चॅलेंजेसचा सामना करावा लागणार आहे. त्यामुळे प्रेक्षकांना त्यांच्या आवडत्या कलाकारांचा अभिनयापेक्षा पूर्णपणे वेगळा अंदाज पाहायला मिळणार आहे.
Leave a Reply