MI vs CSK : चेन्नईकडून मोठा गेम, मुंबईच्या माजी खेळाडूला आयुष म्हात्रेच्या जागी संधी, कोण आहे तो?

आयपीएल स्पर्धेच्या 19 व्या मोसमात (IPL 2026) आज 23 एप्रिलला मुंबई इंडियन्स विरुद्ध चेन्नई सुपर किंग्स आमनेसामने असणआर आहेत. उभयसंघातील सामन्याला थोड्याच वेळात मुंबईतील वानखेडे स्टेडियममध्ये सुरुवात होणार आहे. दोन्ही संघांनी या सामन्याआधी जोरदार सराव केला आहे. आंतरराष्ट्रीय क्रिकेटमध्ये ज्या प्रकारे भारत-पाकिस्तान सामन्याची उत्सूकता चाहत्यांना असते तितकीच प्रतिक्षा आयपीएल स्पर्धेत चेन्नई-मुंबई मॅचची असते. यावरुन या सामन्याची क्रेझ लक्षात येते. सामन्याला अवघे काही तास बाकी असताना आता चेन्नईच्या गोटातून मोठी अपडेट समोर आली आहे. चेन्नईने युवा फलंदाज आयुष म्हात्रे याच्या जागी बदली खेळाडूच्या नावाची घोषणा केली आहे. आयुष म्हात्रे याला दुखापतीमुळे आयपीएल स्पर्धेच्या उर्वरित 19 व्या मोसमातून बाहेर व्हावं लागलं आहे.

आकाश मढवाल याचा समावेश

चेन्नई टीमने आयुषच्या जागी टीममध्ये आकाश मढवाल याचा समावेश केला आहे. आकाश वेगवान गोलंदाज आहे. मात्र फलंदाजाच्या जागी फलंदाजाला संधी न दिलेल्या क्रिकेट चाहत्यांकडून आश्चर्य व्यक्त करण्यात येत आहे. मात्र चेन्नईत बरेच फलंदाज आहेत. त्यामुळे फलंदाजाऐवजी गोलंदाजाला आयुषच्या जागी संधी दिल्याचं म्हटलं जात आहे. आकाश आयपीएल स्पर्धेत आधी मुंबई इंडियन्सकडून खेळला आहे. त्यामुळे यलो आर्मी आकाशला पलटण विरूद्धच्या सामन्यासाठी प्लेइंग ईलेव्हनमध्ये संधी देणार का? हे पाहणं महत्त्वाचं ठरणार आहे.

आयुषला काय झालं?

आयुषला सनरायजर्स हैदराबाद विरूद्धच्या सामन्यात बॅटिंग करताना हॅमस्ट्रिंग दुखापत झाली होती. आयुषला या दुखापतीमुळे संपूर्ण मोसमातून बाहेर व्हावं लागलं. तेव्हापासून चाहत्यांना आयुष म्हात्रे याच्या जागी कुणाला संधी दिली जाणार? याची प्रतिक्षा होती, अखेर ही प्रतिक्षा संपली आहे.

आकाश मढवालबाबत थोडक्यात पण महत्वाचं

आकाश उजव्या हाताने बॉलिंग करतो. आकाशने याआधी आयपीएल स्पर्धेत 2 संघांचं प्रतिनिधित्व केलंय. आकाश 2 मोसमात मुंबई इंडियन्सचं तर एका हंगामात राजस्थान रॉयल्सकडून खेळला आहे. आकाश 2023 आणि 2024 साली मुंबईसाठी खेळला होता. तर आकाश गेल्या मोसमात (IPL 2025) राजस्थान रॉयल्सकडून खेळला होता.

आयुषच्या जागी आकाशचा समावेश, चेन्नईची घोषणा

Official Announcement

Speed incoming!!
Akash Madhwal is now #Yellove

Note: Akash Madhwal replaces Ayush Mhatre, who has been ruled out due to hamstring injury.#WhistlePodu pic.twitter.com/tSgnZupmZb

— Chennai Super Kings (@ChennaiIPL) April 23, 2026

आकाशने आयपीएल कारकीर्दीत आतापर्यंत 17 सामन्यानंत एकूण 23 विकेट्स मिळवल्या आहेत. आकाशने 2023 साली एलिमिनेटर सामन्यात आयपीएल कारकीर्दीतील सर्वोत्तम कामगिरी केली होती. आकाशने त्या सामन्यात 3.3 ओव्हरमध्ये अवघ्या 5 धावांच्या मोबदल्यात 5 विकेट्स घेत आपली छाप सोडली होती. त्यामुळे हाच मुंबईचाच माजी खेळाडू आता चेन्नईकडून खेळताना पलटण विरुद्ध कशी कामगिरी करतो हे पाहणं महत्त्वाचं ठरणार आहे.