ब्रिक्सच्या १८ व्या शिखर परिषदेत सदस्य देशांमध्ये संयुक्त निवेदनावर सहमती झाली असल्याची माहिती सूत्रांकडून मिळत आहे. या निवेदनावर सर्व सदस्य देशांनी शिक्कामोर्तब केले आहे. सूत्रांच्या माहितीनुसार, परिषदेदरम्यान अनेक संवेदनशील आणि महत्त्वाच्या मुद्द्यांवर सदस्य देशांमध्ये सुरुवातीला मतभेद होते. मात्र, या मतभेदांवर तोडगा काढण्यासाठी आज पहाटे चार वाजेपर्यंत संयुक्त निवेदनावर चर्चा सुरू होती. भारताने या संपूर्ण प्रक्रियेत सातत्याने पुढाकार घेऊन संवाद साधला आणि सदस्य देशांमधील मतभेद दूर करण्याचा प्रयत्न केला, असे कळते. लवकरच ब्रिक्स सदस्य देशांकडून हे संयुक्त निवेदन अधिकृतपणे जारी केले जाईल.
याशिवाय, आणखी एका महत्त्वाच्या घडामोडीत, केंद्रीय गृहमंत्री अमित शाह उद्या मुंबईत पत्रकार परिषद घेणार आहेत. पंतप्रधान नरेंद्र मोदी यांच्या जन्मदिनानिमित्त आयोजित सेवा संकल्प अभियान या उपक्रमाच्या पार्श्वभूमीवर या पत्रकार परिषदेचे आयोजन करण्यात आले आहे. याप्रसंगी मुख्यमंत्री देवेंद्र फडणवीस, प्रदेशाध्यक्ष रवींद्र चव्हाण आणि भाजपचे इतर महत्त्वाचे नेते उपस्थित राहणार आहेत. ही पत्रकार परिषद महिला आर्थिक विकास महामंडळाच्या सभागृहात होणार आहे.
Leave a Reply