अभिनेत्री संजीदा शेख ही टीव्हीपासून चित्रपट आणि ओटीटीपर्यंत आपल्या अभिनयाची छाप पाडणारी लोकप्रिय अभिनेत्री आहे. मात्र, ग्लॅमरच्या दुनियेत असूनही संजीदा नेहमीच प्रसिद्धी आणि दिखाव्यापासून दूर राहणं पसंत करते. आपल्या वैयक्तिक आयुष्याबाबतही ती फारशी चर्चा करताना दिसत नाही. (All photos : Instagram / iamsanjeeda)
नुकत्याच एका मुलाखतीदरम्यान संजीदाला, “मुलीच्या जन्मानंतर तू अधिक चांगली अभिनेत्री झालीस असं तुला वाटतं का?” असा प्रश्न विचारण्यात आला. यावर तिने स्पष्टपणे, “मला असं वाटत नाही,” असं उत्तर दिलं.
संजीदाने सांगितलं की, “जेव्हा मी कामावर असते, तेव्हा माझं संपूर्ण लक्ष कामावरच असतं. त्या वेळी माझी मुलगी आहे, हेही मी विसरून जाते. कारण मला माहीत असतं की ती सुरक्षित आहे.” काम आणि मातृत्व या दोन्ही गोष्टी ती आपल्या पद्धतीने सांभाळत असल्याचं तिच्या या वक्तव्यातून स्पष्ट होतं.
आपल्या वैयक्तिक आयुष्याबाबत होणाऱ्या चर्चांवरही संजीदाने स्पष्ट भूमिका मांडली. “बाहेरच्या जगात जे गॉसिप सुरू असतं, त्याचा मी माझ्या वैयक्तिक आयुष्यावर परिणाम होऊ देत नाही. लोक काय म्हणतात, यानेही मला फरक पडत नाही,” असं तिने सांगितलं.
संजीदाला तिच्या फिटनेसचं रहस्य विचारण्यात आलं असता तिनेही अगदी साधं उत्तर दिलं. “मी अतिशय नॉर्मल मुलगी आहे आणि नॉर्मल राहायला मला आवडतं. फिट राहण्यासाठी मी खूप जास्त मेहनत करत नाही,” असं ती म्हणाली.
संजीदाच्या वैयक्तिक आयुष्याबद्दल बोलायचं झालं तर, तिने 2 मार्च 2012 रोजी अभिनेता आमिर अलीसोबत लग्न केलं होतं. या दोघांना एक मुलगी आहे. मात्र, लग्नाच्या जवळपास दहा वर्षांनंतर त्यांच्या नात्यात दुरावा निर्माण झाला आणि दोघांनी घटस्फोट घेतला.
सध्या संजीदा आपल्या मुलीचा एकटीने सांभाळ करत आहे. दरम्यान, गेल्या काही काळापासून तिचं नाव अभिनेता हर्षवर्धन राणेसोबत जोडलं जात आहे. मात्र, या चर्चांवर संजीदाने अद्याप कोणतीही अधिकृत प्रतिक्रिया दिलेली नाही.
Leave a Reply